ഇംസൈ അരസന്‍ 24ത് പുലികേശി എന്ന സിനിമയുടെ ഷൂട്ടിംഗ് സെറ്റില്‍ മോശമായി പെരുമാറുകയും ചിത്രീകരണം തടസപ്പെടുത്തുകയും ചെയ്ത നടന്‍ വടിവേലുവിന് നഷ്ടപരിഹാരം ആവശ്യപ്പെട്ട് തമിഴ് സിനിമ പ്രൊഡ്യൂസേഴ്സ് കൗണ്‍സില്‍ നോട്ടീസ് അയച്ചു.
സിനിമയില്‍ അഭിനയിക്കാന്‍ മുന്‍കൂര്‍ തുക വാങ്ങി ഒപ്പിട്ടതിന് ശേഷം ചിത്രീകരണത്തിന് സഹകരിക്കാത്തതിനെ തുടര്‍ന്ന് വടിവേലുവിനെതിരെ പരാതി ഉയര്‍ന്നിരുന്നു. സിനിമ പകുതിയായപ്പോള്‍ കൂടുതല്‍ തുക നല്‍കിയാലെ അഭിനയിക്കു എന്ന് നിബന്ധന വെച്ചതിനെ തുടര്‍ന്നാണ് നിര്‍മാതാവ് ശങ്കര്‍ പ്രൊഡ്യൂസേഴ്സ് കൗണ്‍സിലില്‍ വടിവേലുവിനെതിരെ പരാതി നല്‍കിയത്.
സിനിമയിലെ സഹതാരങ്ങളെ മാറ്റി പകരം വടിവേലു നിര്‍ദ്ദേശിക്കുന്നവരെ ചിത്രത്തില്‍ ഉള്‍പ്പെടുത്താനും നിര്‍ബന്ധിച്ചു. ഈ നിബന്ധനകളൊക്കെ സംവിധായന്‍ സമ്മതിച്ചുവെങ്കിലും കോസ്റ്റ്യൂം ഡിസൈനറെ മാറ്റണമെന്ന് നിര്‍ബന്ധിച്ചതോടെയാണ് നടികര്‍സംഗത്തിനും പ്രൊഡ്യൂസേഴ്സ് സംഘടനയ്ക്കും പരാതി നല്‍കിയത്.
ചിമ്പുദേവനാണ് ചിത്രം സംവിധാനം ചെയ്യുന്നത്. ഇംസൈ അരസന്‍ 23 പുലികേശിയുടെ സ്വീക്വലാണ് ഇംസൈ അരസന്‍ 24 പുലികേശി. ചിത്രീകരണത്തിന് സഹകരിച്ചില്ലെങ്കില്‍ വടിവേലു നഷ്ടപരിഹാതത്തുക നല്‍കേണ്ടി വരും. വാര്‍ത്ത പുറത്തായതോടെ മറ്റു രണ്ട് സംവിധായകര്‍ കൂടി അഡ്വാന്‍സ് തിരിച്ച് കിട്ടണമെന്ന ആവശ്യവുമായി രംഗത്തെത്തിയിട്ടുണ്ട്.
