റിലീസ് ദിനത്തില് സമ്മിശ്ര പ്രതികരണങ്ങളാണ് ലഭിച്ചതെങ്കിലും ഓപ്പണിങ് ദിനത്തില് കളക്ഷനില് ഞെട്ടിച്ച് ‘ഇന്ത്യന് 2’. 17 കോടിയോളം തമിഴില് നിന്നും മാത്രം നേടിയ ചിത്രം ആഗോളതലത്തില് 26 കോടി രൂപയാണ് സ്വന്തമാക്കിയിരിക്കുന്നത്. എന്നാല് സിനിമയ്ക്ക് ലഭിക്കുന്ന മോശം അഭിപ്രായങ്ങള് ഇനിയുള്ള കളക്ഷനെ ബാധിച്ചേക്കും എന്നാണ് റിപ്പോര്ട്ടുകള്.
വളരെ ദയനീയമായ ഫസ്റ്റ്ഹാഫ് ആണെന്നും ഒരു ശങ്കര്-കമല് സിനിമയാണ് ഇതെന്നും പറയാനാവില്ല എന്നാണ് സിനിമ കണ്ടിറങ്ങിയ പ്രേക്ഷകര് പ്രതികരിച്ചത്. കമല് ഹാസന് ഇനിയങ്ങോട്ട് ട്രോളുകള് ആയിരിക്കുമെന്നും ചിലര് അഭിപ്രായപ്പെടുന്നുണ്ട്. ഒരു ശങ്കര് സിനിമയ്ക്ക് വേണ്ട എല്ലാ ചേരുവകളും ഒരുക്കിയ കൊമേഴ്യല് എന്റര്ടെയ്നറാണ് സിനിമ എന്നുള്ള പൊസിറ്റീവ് റിവ്യൂകളും എത്തുന്നുണ്ട്.
അതേസമയം, അഴിമതിക്കെതിരെ പോരാടുന്ന ഇന്ത്യന് എന്ന കഥാപാത്രമായി കമല്ഹാസന് തകര്ത്തഭിനയിച്ച ‘ഇന്ത്യന്’ 1996ല് ആണ് പ്രദര്ശനത്തിനെത്തിയത്. ചിത്രത്തില് ഇരട്ടവേഷത്തില് അഭിനയിച്ച കമല്ഹാസന് മികച്ച നടനുള്ള ദേശീയ പുരസ്കാരവും ലഭിച്ചിരുന്നു. ഇന്ത്യന് സിനിയുടെ ക്ലൈമാക്സ് രംഗം ആ സിനിമയ്ക്ക് ഒരു തുടര്ച്ചയുണ്ടാകുമെന്ന സൂചന നല്കിയിരുന്നു.
250 കോടി ബജറ്റില് ആണ് ഇന്ത്യന് 2 ഒരുക്കിയത്. ശങ്കറിന്റെ സംവിധാനത്തില് എത്തുന്ന ചിത്രം ഉദയനിധി സ്റ്റാലിനും എ സുബാസ്ക്കരനും ചേര്ന്നാണ് നിര്മ്മിക്കുന്നത്. രാകുല് പ്രീത് സിങ്, പ്രിയ ഭവാനി ശങ്കര്, സിദ്ധാര്ഥ്, എസ്.ജെ സൂര്യ, മാര്ക്ക് ബെന്നിങ്ടണ്, വി ജയപ്രകാശ്, ബോബി സിംഹ, നെടുമുടി വേണു തുടങ്ങി നിരവധി താരങ്ങളാണ് ചിത്രത്തില് പ്രധാന റോളുകളില് എത്തുന്നത്.