ധനുഷിന്റെ സംവിധാനത്തില് ഒരുങ്ങുന്ന നാലാം ചിത്രം ‘ഇഡ്ലി കടൈ’ റിലീസിന് ഒരുങ്ങുന്നു. അടുത്ത വര്ഷം ഏപ്രില് 10ന് ആണ് ചിത്രം തിയേറ്ററുകളില് എത്തുക. നിത്യ മേനോന് ആണ് ചിത്രത്തില് നായിക. ശാലിനി പാണ്ഡേ ആണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്.
ഒരു ഇഡ്ലി കടയിലേക്ക് നടക്കുന്ന ധനുഷ് കഥാപാത്രത്തിന്റെ ചിത്രീകരണമാണ് റിലീസ് ഡേറ്റ് പ്രഖ്യാപന പോസ്റ്ററില് ഉള്ളത്. ഡൗണ് പിക്ചേഴ്സിന്റെ ബാനറില് ആകാശ് ഭാസ്കരനും ധനുഷും ചേര്ന്നാണ് ഇഡ്ലി കടൈ നിര്മ്മിക്കുന്നത്. ഡൗണ് പിക്ചേഴ്സിന്റെ ആദ്യ നിര്മ്മാണ സംരംഭം കൂടിയാണിത്. ജിവി പ്രകാശ് കുമാറാണ് സംഗീതം.
ചിത്രത്തെ കുറിച്ച് ജിവി പ്രകാശ് അടുത്തിടെ സംസാരിച്ചിരുന്നു. നിത്യ മേനോന്-ധനുഷ് കോമ്പോയിലെത്തിയ ‘തിരുച്ചിത്രമ്പലം’ പോലെ തന്നെ ഇമോഷന്സിന് പ്രാധാന്യം നല്കുന്നതാണ് ഇഡ്ലി കടൈ എന്നും താന് സിനിമ 40 മിനിറ്റോളം കണ്ടു എന്നുമായി ജിവി പ്രകാശ് പറഞ്ഞത്.
അതേസമയം, ധനുഷ് അഭിനയിക്കുന്ന 52-ാമത്തെ ചിത്രം കൂടിയാണിത്. പ പാണ്ടി, രായന് എന്നിവയാണ് ധനുഷിന്റെ സംവിധാനത്തില് ഇതിനകം പുറത്തെത്തിയ ചിത്രങ്ങള്, നിലാവുക്ക് എന്മേല് എന്നടി കോപം എന്ന ചിത്രവും ധനുഷിന്റെ സംവിധാനത്തില് പ്രഖ്യാപിച്ചിട്ടുണ്ട്.