ഇരട്ട, നായാട്ട്, ജോസഫ് എന്നീ സിനിമകളിലൂടെ ശ്രദ്ധേയമായ പൊലീസ് കഥാപാത്രങ്ങളെ അവതരിപ്പിച്ച് പ്രശംസകൾ ഏറ്റുവാങ്ങിയ താരമാണ് ജോജു ജോർജ്. ഒരിടവേളയ്ക്ക് ശേഷം ജോജു ജോർജ് പൊലീസ് കഥാപാത്രമായി എത്തുന്ന സിനിമയാണ് എ. കെ സാജൻ സംവിധാനം ചെയ്യുന്ന ‘പുലിമട’
ഇപ്പോഴിതാ ചിത്രത്തിന്റെ റിലീസ് തിയ്യതി പ്രഖ്യാപിച്ചിരിക്കുകയാണ്. ഒക്ടോബർ 26 നാണ് ചിത്രം തിയേറ്ററുകളിൽ എത്തുന്നത്. വിൻസെന്റ് എന്ന പൊലീസ് കോൺസ്റ്റബിൾ ആയാണ് ജോജു ചിത്രത്തിലെത്തുന്നത്.
വിൻസെന്റ് സ്കറിയ എന്ന പൊലീസ് ഓഫീസറുടെ വിവാഹവും അതിനോടനുബന്ധിച്ച് നടക്കുന്ന കാര്യങ്ങളുമാണ് ചിത്രം ചർച്ചചെയ്യുന്നത്. സംവിധായകനായ എ. കെ സാജൻ തന്നെയാണ് ചിത്രത്തിന്റെ രചനയും എഡിറ്റിംഗും നിർവഹിച്ചിരിക്കുന്നത്.
ഐശ്വര്യ രാജേഷ്, ചെമ്പൻ വിനോദ്, ബാലചന്ദ്ര മേനോൻ, ജിയോ ബേബി, ജോണി ആന്റണി, ജാഫർ ഇടുക്കി, തുടങ്ങീ നിരവധി താരങ്ങളാണ് ചിത്രത്തിൽ അണിനിരക്കുന്നത്. പ്രശസ്ത ഛായാഗ്രഹകനും സംവിധായകനുമായ വേണുവാണ് പുലിമടയുടെ ഛായാഗ്രഹണം നിർവഹിക്കുന്നത്.