മലയാള സിനിമകൾ അതിമനോഹരമാണെന്നും അത് തീർച്ചയായും കാണണമെന്നും പാകിസ്ഥാനി താരം മാഹിര ഖാൻ. ഷാരൂഖ് ഖാന്റെ ‘റയീസ്’ എന്ന ചിത്രത്തിൽ നായികയായി അഭിനയിച്ചത്തിന് പിന്നാലെ ഇന്ത്യയിൽ ശ്രദ്ധ നേടിയ താരം ഒരു റൗണ്ട് ടേബിൾ ഡിസ്കഷനിലിൽ മലയാള സിനിമയെക്കുറിച്ച് താരം സംസാരിക്കുന്നതിന്റെ വീഡിയോ ആണ് ഇപ്പോൾ വൈറലാകുന്നത്.
‘നിങ്ങൾ എപ്പോഴെങ്കിലും മലയാള സിനിമകൾ കണ്ടിട്ടുണ്ടോ? നിങ്ങൾ തീർച്ചയായും കാണണം. അവർ സിനിമകൾ ബോളിവുഡിലേക്ക് വിറ്റ് കൂടുതൽ പണം സമ്പാദിക്കുന്നു എന്നാണു ഞാൻ മനസ്സിലാക്കിയത്. അത് തെറ്റാണോ എന്നെനിക്കറിയില്ല. പക്ഷെ അവരുടെ സിനിമയുടെ ആശയങ്ങൾ, സംവിധാനം, ലൈറ്റിങ് എല്ലാം നിങ്ങളെ അത്ഭുതപ്പെടുത്തും’ എന്നാണ് താരം പറഞ്ഞത്.
ഇതിനിടെ ‘കെജിഎഫ്’ മലയാളം സിനിമയാണോ എന്ന് ചോദിക്കുന്ന ആളെ മാഹിര തിരുത്തുന്നുമുണ്ട്. ഞാൻ തെലുങ്കു, തമിഴ് സിനിമകളെ കുറിച്ചല്ല പറയുന്നത് മലയാളം സിനിമകളെ കുറിച്ചാണ് പറയുന്നതെന്നും താരം പറയുന്നുണ്ട്. മോഹൻലാൽ, പൃഥ്വിരാജ് പ്രിയദർശൻ എന്നിവരെക്കുറിച്ചും വിഡിയോയിൽ സംസാരിക്കുന്നുണ്ട്. പൃഥ്വിരാജിനെ ഒരിക്കൽ കണ്ടിരുന്നുവെന്നും മാഹിര പറഞ്ഞു.
മോഹൻലാലിന്റെ സിനിമകൾ അല്ലേ ബോളിവുഡ് റീമേക് ചെയ്യുന്നത് എന്നും ചർച്ചയിൽ പങ്കെടുത്ത ഒരാൾ പറയുന്നുണ്ട്. വീഡിയോ വൈറലായതോടെ സിനിമ പ്രേക്ഷർക്കിടയിൽ ഈ ക്ലിപ്പ് ഹിറ്റായിരിക്കുകയാണ്.