ഇന്ത്യയുടെ പ്രതീക്ഷയുമായണ് ‘ആര്ആര്ആര്’ ചിത്രത്തിലെ ‘നാട്ടു നാട്ടു’ ഗാനം 2023 ഓസ്കര് അവാര്ഡ്സില് മത്സരിക്കുന്നത്. മികച്ച ഒറിജിനല് സോംഗ് വിഭാഗത്തിലാണ് ഗാനം മത്സരിക്കുന്നത്. ഡോള്ബി തിയേറ്ററില് നടക്കുന്ന പുരസ്കാര ചടങ്ങില് രാഹുല് സിപ്ലിഗഞ്ചും കാലഭൈരവയും ചേര്ന്ന് ഗാനം വേദിയില് അവതരിപ്പിക്കുന്നുമുണ്ട്.
ഓസ്കര് വേദിയില് ഈ ഗാനത്തിന് നൃത്തം ചെയ്യാന് എത്തുന്നത് രാം ചരണും ജൂനിയര് എന്ടിആറുമല്ല. അമേരിക്കന് നടിയും നര്ത്തകിയുമായ ലോറന് ഗോട്ലീബ് ആണ്. ഇന്ത്യന് സിനിമകളിലും റിയാലിറ്റി ഷോകളിലും പ്രവര്ത്തിച്ചിട്ടുള്ള താരമാണ് ലോറന്. നടി തന്നെയാണ് ഇക്കാര്യം സോഷ്യല് മീഡിയയിലൂടെ പങ്കുവച്ചത്.
”സ്പെഷ്യല് ന്യൂസ്, ഓസ്കര് വേദിയില് നാട്ടു നാട്ടു ഗാനത്തിന് ഞാന് ചുവടു വയ്ക്കും. ലോകത്തിലെ ഏറ്റവും അഭിമാനകരമായ വേദിയില് ഇന്ത്യയെ പ്രതിനിധീകരിക്കാന് സാധിച്ചതില് എനിക്ക് ആവേശമുണ്ട്. വിഷ് മി ലക്” എന്നാണ് ലോറന് സോഷ്യല് മീഡിയയില് കുറിച്ചിരിക്കുന്നത്.
‘എബിസിഡി: എനിബഡി കാന് ഡാന്സ്’, ‘ഡിക്ടറ്റീവ് ബ്യോംകേഷ് ബക്ഷി’, ‘എബിസിഡി 2’ എന്നീ സിനിമകളില് അഭിനയിച്ചിട്ടുള്ള താരമാണ് ലോറന്. ‘ജലക് ദികലാ ജാ, ബിഗ് ബോസ്, കോമഡി ക്ലാസസ്, കോമഡി നൈറ്റ്സ് ലൈവ് എന്നീ ഹിന്ദി ടെലിവിഷന് ഷോകളിലും ലോറന് പങ്കെടുത്തിട്ടുണ്ട്.
അതേസമയം, ഗോള്ഡന് ഗ്ലോബ് പുരസ്കാരത്തിന് പിന്നാലെ നാട്ടു നാട്ടു ഗാനം അക്കാദമി അവാര്ഡ് കൂടി നേടിയാല് അത് പുതു ചരിത്രമാകും. തിങ്കളാഴ്ച ഇന്ത്യന് സമയം 5.30ന് ആണ് പുരസ്കാര ചടങ്ങ് ആരംഭിക്കുക.