അവഞ്ചേര്‍സ്: എന്‍ഡ് ഗെയിം മേക്കിംഗ് വീഡിയോ അണിയറപ്രവര്‍ത്തകര്‍ പുറത്തുവിട്ടു. ചിത്രത്തിന്റെ അവസാനഭാഗത്തു നടക്കുന്ന ബ്രഹ്മാണ്ഡയുദ്ധത്തിന്റെ മേക്കിംഗ് വീഡിയോയാണ് ഇപ്പോള്‍ പുറത്തുവന്നിരിക്കുന്നത്. വളരെ ആവേശത്തോടെയാണ് മേക്കിംഗ് വീഡിയോയെയും സിനിമാ ലോകം സ്വീകരിച്ചിരിക്കുന്നത്. മൂന്ന് വര്‍ഷം കൊണ്ടാണ് ചിത്രത്തിന്റെ ഗ്രാഫിക്‌സ് പൂര്‍ത്തീകരിച്ചത്. ഡാന്‍ ഡുലോയായിരുന്നു ചിത്രത്തിന്റെ എന്‍ഡ് ഗെയ്മിന്റെ വിഎഫ്എക്‌സ് സൂപ്പര്‍വൈസര്‍.
ലോകത്ത് ഏറ്റവും കൂടുതല്‍ പണം വാരിയ സിനിമകളുടെ പട്ടികയില്‍ ഒന്നാം സ്ഥാനത്താണ് എന്‍ഡ് ഗെയിം. വര്‍ഷങ്ങളായി ജയിംസ് കാമറൂണിന്റെ സൃഷ്ടികളായിരുന്ന അവതാറും ടൈറ്റാനിക്കുമായിരുന്നു ഒന്നും രണ്ടും സ്ഥാനങ്ങളില്‍. എന്നാല്‍ അവഞ്ചേഴ്സ് എന്‍ഡ് ഗെയിമിന്റെ വരവോടെ കാര്യങ്ങല്‍ മാറിമറിഞ്ഞു.
ഒന്നാം സ്ഥാനത്തായിരുന്ന അവതാറിന്റെ കളക്ഷന്‍ 2.78 ബില്യണ്‍ ആയിരുന്നു. ആ റെക്കോര്‍ഡാണ് “അവഞ്ചേഴ്സ് എന്‍ഡ് ഗെയിം” മറികടന്നത്. മൂന്നാം സ്ഥാനത്ത് നില്‍ക്കുന്ന “ടൈറ്റാനിക്കി”ന്റെ ഇതുവരെയുള്ള കളക്ഷന്‍ 2.1 ബില്യണ്‍ ഡോളറാണ്. വെറും 12 ദിവസങ്ങള്‍ കൊണ്ടാണ് എന്‍ഡ്ഗെയിം ടൈറ്റാനിക്കിന്റെ റെക്കോര്‍ഡ് തകര്‍ത്തത്. അതേസമയം, അവതാറിന്റെ രണ്ടാം ഭാഗം 2021 ഡിസംബര്‍ 17 നോടെ റിലീസിനെത്തിക്കാനുള്ള ശ്രമങ്ങളിലാണ് ജയിംസ് കാമറൂണ്‍. “അവതാര്‍ 2” ന് ബോക്സ് ഓഫീസില്‍ മത്സരിക്കാനുള്ളത് ഇനി “അവഞ്ചേഴ്സി”നോടാവും.
