തലമുറ വ്യത്യാസമില്ലാതെ പ്രേക്ഷകരുടെ മനസില് ഇടം നേടിയ മനോഹര പ്രണയകാവ്യമാണ് ‘ടൈറ്റാനിക്’. 1997- ഡിസംബര് 19-നാണ് ജെയിംസ് കാമറൂണ് സംവിധാനത്തില് ചിത്രം തിയേറ്ററുകളിലെത്തിയത്. കപ്പലപടത്തില് ജാക്കിനെ കൊല്ലാതെ രക്ഷപ്പെടുത്താമായിരുന്നില്ലേ എന്ന ചോദ്യം എപ്പോഴും സംവിധായകന് നേരെ ഉയരാറുണ്ട്.
ചിത്രത്തിന്റെ ക്ലൈമാക്സുമായി ബന്ധപ്പെട്ട് ഒരു വെളിപ്പെടുത്തല് നടത്തിയിരിക്കുകയാണ് ജെയിംസ് കാമറൂണ് ഇപ്പോള്. സിനിമയില് ജാക്ക് മരിക്കേണ്ടത് അനിവാര്യമായിരുവെന്നും അത് തെളിയിക്കാനായി ശാസ്ത്രീയപഠനങ്ങള് നടത്തിയെന്നുമാണ് സംവിധായകന് പറയുന്നത്.
റോസും ജാക്കുമുണ്ടായിരുന്ന സാഹചര്യത്തില് ആരെങ്കിലും ഒരാളേ രക്ഷപ്പെടുമായിരുന്നുള്ളൂ, ഇതിന് ശാസ്ത്രീയ തെളിവുകളുണ്ട്. ടൈറ്റാനിക്കിനെ ചുറ്റിപ്പറ്റിയുള്ള തര്ക്കങ്ങള്ക്ക് അവസാനം കാണുക എന്ന ഉദ്ദേശത്തോട് കൂടി തന്നെ ജാക്കിന്റെയും റോസിന്റെയും അപ്പോഴത്തെ അവസ്ഥ പുനരാവിഷ്കരിച്ചിരുന്നു.
അങ്ങനെയാണ് ജാക്ക് മരിക്കേണ്ടത് ആവശ്യമായിരുന്നു എന്ന് ശാസ്ത്രീയമായി തെളിയിച്ചത്. ഒരു ഹൈപ്പോതെര്മിയ വിദഗ്ധന്റെ സഹായത്തോടെ ഫോറന്സിക് വിശകലനം നടത്തി. ചിത്രത്തിന്റെ ക്ലൈമാക്സില് ഉപയോഗിച്ച അതേ രീതിയിലുള്ള റാഫ്റ്റ് പുനഃസൃഷ്ടിച്ചു.
കേറ്റിന്റെയും ലിയോയുടെയും അതേ ശരീരഭാരമുള്ള സ്റ്റണ്ട് കലാകാരന്മാരെ വെച്ച് നടത്തിയ പരീക്ഷണത്തില് തെളിഞ്ഞത്, അത്തരമൊരു സാഹചര്യത്തില് ആര്ക്കെങ്കിലും ഒരാള്ക്ക് മാത്രമേ അതിജീവിക്കാനാവൂ എന്നായിരുന്നു എന്നാണ് ജെയിംസ് കാമറൂണ് കനേഡിയന് മാധ്യമമായ പോസ്റ്റ് മീഡിയക്ക് നല്കിയ അഭിമുഖത്തില് പറയുന്നത്.