സോഷ്യല്‍ മീഡിയയില്‍ ഏറെ ചര്‍ച്ചയായി മാറിയ ഷോര്‍ട്ട് ഫിലിമാണ് “ഫ്രീഡം അറ്റ് മിഡ്‌നൈറ്റ്”. അനുപമ പരമേശ്വരന്‍, ഹക്കിം ഷാജഹാന്‍ എന്നിവരെ കഥാപാത്രങ്ങളാക്കി ആര്‍ജെ ഷാന്‍ ഒരുക്കിയ ഷോര്‍ട്ട് ഫിലിമിന് പ്രശംസകളും വിമര്‍ശനങ്ങളും ഒരുപോലെ ലഭിച്ചിരുന്നു.
അഞ്ച് മില്യണിലേറെ വ്യൂസ് ലഭിച്ചതോടെ ആര്‍ജെ ഷാനിനെ അഭിനന്ദിച്ചിരിക്കുകയാണ് യൂട്യൂബ്. ആര്‍ജെ ഷാനിനെ ടാഗ് ചെയ്ത്, ചിത്രത്തിൻ്റെ വിഷ്വൽ ട്രീറ്റ് വളരെ മികച്ചതാണെന്നും ഇത് മാസ്റ്റര്‍പീസ് ആണെന്നും സ്‌നേഹം അറിയിക്കുന്നെന്നും യൂട്യൂബ് ഇന്ത്യ കമന്റായി കുറിച്ചു. ഷാന്‍ തന്നെയാണ് കമന്റിന്റെ സ്‌ക്രീന്‍ ഷോട്ട് പങ്കുവച്ചിരിക്കുന്നത്.
സ്ത്രീസ്വാതന്ത്രത്തെ വ്യത്യസ്തമായി നിര്‍വചിച്ച ചിത്രത്തിന് മികച്ച സ്വീകാര്യതയാണ് ലഭിച്ചത്. അരമണിക്കൂര്‍ ദൈര്‍ഘ്യമുളള ഷോര്‍ട്ട് ഫിലിമില്‍ ചന്ദ്ര എന്ന വീട്ടമ്മയുടെ ജീവിതമാണ് പറയുന്നത്. തെലുങ്കിലും കന്നടയിലും ചിത്രം റീമേക്ക് ചെയ്യാനുളള ശ്രമങ്ങളും പുരോഗമിക്കുകയാണ്.
അബ്ദുള്‍ റഹീം ആണ് ചിത്രത്തിന്റെ ഛായാഗ്രാഹകന്‍. ലിജിന്‍ ബാബിനോ ആണ് സംഗീത സംവിധാനം നിര്‍വഹിച്ചിരിക്കുന്നത്. നിര്‍മാണം അഖില മിഥുന്‍. മൂന്നാമിടം, കെയര്‍ ഓഫ് സൈറ ഭാനു എന്നീ സിനിമകള്‍ ഒരുക്കിയ സംവിധായകനാണ് ആര്‍ജെ ഷാന്‍.