വിജയ് രാഷ്ട്രീയത്തിലേക്ക് ഇറങ്ങിയപ്പോള് മകന് ജേസണ് സഞ്ജയ് സിനിമയിലേക്ക്. വിജയ്യുടെ മകന് ജേസണ് സഞ്ജയ് സംവിധായകനാകുന്ന സിനിമ ഔദ്യോഗികമായി പ്രഖ്യാപിച്ചിരിക്കുകയാണ്. ലൈക്ക പ്രൊഡക്ഷന്സിന്റെ ബാനറില് എ. സുബാസ്കരന് നിര്മിക്കുന്ന ചിത്രത്തില് നായകനായി എത്തുന്നത് യുവതാരം സന്ദീപ് കിഷന് ആണ്.
സിനിമയുടെ മോഷന് പോസ്റ്റര് ശ്രദ്ധ നേടുകയാണ്. ചിത്രത്തിന്റെ സംവിധായകന്, നായകന്, സംഗീത സംവിധായകന്, എഡിറ്റര് എന്നിവരെ മോഷന് പോസ്റ്ററിലൂടെ പരിചയപ്പെടുത്തുന്നുണ്ട്. തങ്ങളുടെ പ്രൊഡക്ഷന് ഹൗസ് എല്ലായ്പ്പോഴും നല്ല കഥാകൃത്തുക്കളെ പ്രോത്സാഹിപ്പിക്കാന് പരിശ്രമിച്ചിട്ടുണ്ട് എന്നും ജേസണ് കഥ അവതരിപ്പിച്ചപ്പോള് അതില് പുതുമ അനുഭവപെട്ടു എന്നും ലൈക്ക പ്രൊഡക്ഷന്സിലെ ജി.കെ.എം തമിഴ് കുമരന് പറയുന്നു.
പാന്-ഇന്ത്യന് ശ്രദ്ധ ആകര്ഷിക്കാനുള്ള നിലവാരമുള്ള കഥയാണ് ജേസണ് പറഞ്ഞതെന്നും ‘നിങ്ങള്ക്ക് നഷ്ടപ്പെട്ടവ അതിന്റെ യഥാര്ഥ സ്ഥലത്ത് തിരയുക’ എന്ന പ്രമേയത്തെ ചുറ്റിപ്പറ്റിയാണ് ചിത്രത്തിന്റെ മൂലകഥ ഒരുക്കിയിരിക്കുന്നതെന്നും അദ്ദേഹം വെളിപ്പെടുത്തി. 2025 ജനുവരിയോടെ ഈ പ്രോജക്ടിന്റെ ചിത്രീകരണം ആരംഭിക്കാനാണ് പദ്ധതി.
ഹെഡ് ഓഫ് ലൈക്ക പ്രൊഡക്ഷന്സ് ജികെഎം തമിഴ് കുമരന്, സംഗീതം തമന് എസ്, എഡിറ്റര് പ്രവീണ് കെ.എല്., കോ ഡയറക്ടര് സഞ്ജീവ്, പബ്ലിസിറ്റി ഡിസൈന് ട്യൂണി ജോണ്, വിഎഫ്എക്സ് ഹരിഹരസുതന്, സ്റ്റില്സ് അരുണ് പ്രസാദ്.