വി.എ ശ്രീകുമാറിന്റെ ക്യാമറയ്ക്ക് മുന്നില് വീണ്ടുമെത്തി മോഹന്ലാല്. താരം അഭിനയിക്കുന്ന പുതിയ പരസ്യ ചിത്രം സംവിധാനം ചെയ്യുന്നത് ശ്രീകുമാര് ആണ്. ”ലാലേട്ടനൊപ്പം എന്റെ അടുത്ത ചിത്രം” എന്ന കുറിപ്പ് പങ്കുവച്ച് മോഹന്ലാലിനൊപ്പമുള്ള ചിത്രം നേരത്തെ ശ്രീകുമാര് പങ്കുവച്ചിരുന്നു.
ഈ പരസ്യത്തിന്റെ ഷൂട്ടിംഗ് കഴിഞ്ഞിരിക്കുകയാണ് എന്നാണ് വിവരം. ഒരു വീഡിയോയുടെ ചെറിയൊരു ഗ്ലിംപ്സ് ആണ് ശ്രീകുമാര് ഇപ്പോള് പുറത്തുവിട്ടിരിക്കുന്നത്. ‘ഇനി മറ്റൊരു ചോയിസില്ല’ എന്ന് പറഞ്ഞ് മോഹന്ലാലിന് നേരെ തോക്കു ചൂണ്ടുന്ന യുവതിയാണ് വീഡിയോ ഗ്ലിംപ്സില് ഉള്ളത്.
നിരവധി പേരാണ് വീഡിയോയെ വിമര്ശിച്ചും അനുകൂലിച്ചും രംഗത്ത് എത്തിയിരിക്കുന്നത്. മോഹന്ലാല് പുതുതായി ബ്രാന്ഡ് അംബാസിഡര് ആവുന്ന ഒരു ബിസ്കറ്റ് കമ്പനിയുടെ പരസ്യചിത്രത്തിന് വേണ്ടിയാണ് മോഹന്ലാലും വി.എ ശ്രീകുമാറും വീണ്ടും ഒന്നിക്കുന്നത് എന്ന കാര്യം നേരത്തെ ശ്രീകുമാര് ഫെയ്സ്ബുക്കില് പങ്കുവച്ചിരുന്നു.
ഒടിയന്റെ പ്രധാന ലൊക്കേഷനായിരുന്ന പാലക്കാടാണ് ഈ പരസ്യ ചിത്രവും ഷൂട്ട് ചെയ്യുന്നത്. സിനിമയില് എത്തുന്നതിന് മുമ്പേ പരസ്യ മേഖലയില് സജീവമാണ് വി.എ ശ്രീകുമാര്. പുഷ് എന്ന പേരിലുള്ള ശ്രീകുമാറിന്റെ അഡ്വര്ട്ടൈസിംഗ് കമ്പനിയുടെ പരസ്യങ്ങളില് ഇന്ത്യയിലെ ഒട്ടുമിക്ക സിനിമാ സൂപ്പര്താരങ്ങളും അഭിനയിച്ചിട്ടുണ്ട്.
ശ്രീകുമാര് സംവിധാനം ചെയ്ത ഒരേയൊരു ചിത്രമാണ് ഒടിയന്. ഇതിന് ശേഷം മാപ്പിള ഖലാസികളുടെ ജീവിതം പറയുന്ന ഒരു ബോളിവുഡ് ചിത്രം ശ്രീകുമാര് പ്രഖ്യാപിച്ചിരുന്നു. ‘മിഷന് കൊങ്കണ്’ എന്ന് പേരിട്ട ചിത്രത്തില് മോഹന്ലാല് ആണ് നായകന്.