മറ്റൊരു മലയാളഗാനത്തിനും ലഭിക്കാത്ത നേട്ടം സ്വന്തമാക്കിയിരിക്കുകയാണ് ആടുജീവിതം എന്ന ചിത്രത്തിലെ ജിതിൻ രാജ് ആലപിച്ച പെരിയോനേ എന്ന ഗാനം. എ ആർ റഹ്മാൻ്റെ മലയാളത്തിലേക്കുള്ള മടങ്ങിവരവ് ആഘോഷമാക്കിയ ചിത്രം കൂടിയായിരുന്നു പൃഥ്വിരാജിനെ നായകനാക്കി ബ്ലെസി സംവിധാനംചെയ്ത ഈ ആടുജീവിതം.
ചിത്രത്തിലെ ഗാനങ്ങൾ എല്ലാം തന്നെ മികച്ചതായിരുന്നെങ്കിലും ‘പെരിയോനേ’ എന്ന ഗാനം പ്രേക്ഷക മനസുകളിൽ ഒരുപിടി മുന്നിലായിരുന്നു. ഹോളിവുഡ് മ്യൂസിക് ഇൻ മീഡിയ അവാർഡ് പട്ടികയിൽ ഇടംപിടിച്ചിരിക്കുകയാണ് ‘പെരിയോനേ’ ഗാനം. ലോക പ്രശസ്തമായ ഹോളിവുഡ് മ്യൂസിക് ഇൻ മീഡിയ പുരസ്കാരങ്ങൾക്കായുള്ള (HMMA) നാമനിർദേശ പട്ടികയിൽ പെരിയോനേയും ഇടംപിടിച്ചിരിക്കുകയാണ്.
ഇക്കഴിഞ്ഞ ബുധനാഴ്ചയാണ് അധികൃതർ പട്ടിക പുറത്തുവിട്ടത്. ഫീച്ചർ ഫിലിം വിഭാഗത്തിലാണ് ‘പെരിയോനേ’യും മത്സരിക്കുന്നത്. എ.ആർ.റഹ്മാനും റഫീഖ് അഹമ്മദും ചേർന്നാണ് ഗാനം രചിച്ചിരിക്കുന്നത്. നിലവിൽ ആടുജീവിതം ഓസ്കറിൽ മത്സരിപ്പിക്കുന്നതുമായി ബന്ധപ്പെട്ട് വിദേശത്താണ് സംവിധായകൻ ബ്ലെസി. അതേസമയം ചാലഞ്ചേഴ്സ്, എമിലിയ പേരെസ്, ബെറ്റർമാൻ, ട്വിസ്റ്റേഴ്സ്, ദ ഐഡിയ ഓഫ് യു, ദ സിക്സ് ട്രിപ്പിൾ എയ്റ്റ്, ബ്ലിറ്റ്സ് എന്നിവയാണ് ആടുജീവിതത്തിനുപുറമേ ഫീച്ചർ ഫിലിം ഗാന വിഭാഗത്തിലെ മറ്റുചിത്രങ്ങൾ.