സിനിമാ സെറ്റിലെ സംഘര്ഷത്തനിടയില് നടന് ഷൈന് ടോം ചാക്കോ മര്ദ്ദിച്ചെന്ന് ആരോപിച്ച നാട്ടുകാരന് ആശുപത്രിയില്. ഷമീര് എന്നയാള്ക്കാണ് പരിക്കേറ്റത്. ടൊവിനോ തോമസ് നായകനാകുന്ന തല്ലുമാല എന്ന ചിത്രത്തിന്റെ സെറ്റിലാണ് ഇന്നലെ സംഘര്ഷം നടന്നത്.
വെയ്സ്റ്റ് ഇടുന്നത് ചോദ്യം ചെയ്ത നാട്ടുകാരനെ ഷൈന് ടോം ചാക്കോ തല്ലിയെന്ന ആരോപണമുയര്ന്നതിനെ തുടര്ന്നാണ് സംഘര്ഷമുണ്ടായത്. എച്ച്.എം.ഡി മാപ്പിളാസ് ഗോഡൗണില് വച്ച് സിനിമയുടെ ചിത്രീകരണം നടക്കവേയാണ് വാക്കേറ്റവും ഉന്തും തള്ളും നടന്നത്.
വെയ്സ്റ്റ് ഇടുന്നതിനേയും പൊതുനിരത്തില് വണ്ടി പാര്ക്ക് ചെയ്തതിനേയും നാട്ടുകാര് ചോദ്യം ചെയ്തു. ഇവരുമായി ചിത്രത്തിന്റെ അണിയറ പ്രവര്ത്തകും ഷൈനും ചേര്ന്ന് വാക്കേറ്റം നടത്തിയെന്നും ആരോപിക്കുന്നു.
തര്ക്കത്തിനിടയ്ക്ക് ടൊവിനോയും ഇടപെട്ടു. ഇതോടെ സ്ഥലത്ത് സംഘര്ഷാവസ്ഥ ഉണ്ടാവുകയായിരുന്നു. പൊലീസ് സ്ഥലത്ത് എത്തി ഇരുകൂട്ടരുമായി സംസാരിച്ച് സ്ഥിതിഗതികള് ശാന്തമാക്കിയിരുന്നു.