പന്ത്രണ്ട് വര്ഷത്തിന് ശേഷം വിശാല് ചിത്രം ‘മദഗജരാജ’ റിലീസിന് ഒരുങ്ങുന്നു. 2013ല് റിലീസ് ചെയ്യാനിരുന്ന ചിത്രമാണ് 12 വര്ഷത്തിന് ശേഷം തിയേറ്ററുകളില് എത്താന് പോകുന്നത്. സുന്ദര് സി സംവിധാനം ചെയ്ത ചിത്രം ഈ മാസം 12ന് ആണ് തിയേറ്ററുകളിലെത്തുന്നത്. ചിത്രത്തിലെ മറ്റൊരു പ്രധാന കഥാപാത്രമായ നടന് സന്താനമാണ് ഇക്കാര്യം അറിയിച്ചത്.
2011ല് മദഗജരാജയുടെ ട്രെയ്ലറും ഒരു ഗാനവും പുറത്തു വന്നിരുന്നു. സിനിമ 2013ല് റിലീസ് ചെയ്യേണ്ടിയിരുന്നെങ്കിലും സാമ്പത്തിക പ്രശ്നം കാരണം റിലീസ് നീളുകയായിരുന്നു. എന്നാല് ഇതിനിടെ വിശാലും സുന്ദര് സിയും അവരുടേതായി നിരവധി ചിത്രങ്ങളും ചെയ്തു. ഒടുവില് 2025ല് പൊങ്കല് റിലീസായാണ് ചിത്രമെത്തുക എന്നാണ് സന്താനം എക്സ് പോസ്റ്റിലൂടെ അറിയിച്ചിരിക്കുന്നത്.
അഞ്ജലിയും വരലക്ഷ്മി ശരത്കുമാറുമാണ് ചിത്രത്തില് നായികമാര്. സോനു സൂദ്, സതീഷ്, അന്തരിച്ച നടന്മാരായ മയില്സാമി, മനോബാല എന്നിവരും ചിത്രത്തില് പ്രധാന വേഷങ്ങളിലുണ്ട്. വിജയ് ആന്റണിയാണ് സംഗീത സംവിധാനം. ചിത്രത്തില് വിശാല് ഒരു ഗാനം ആലപിച്ചിട്ടുമുണ്ട്. വിശാല് ഫിലിം ഫാക്ടറിയും ജെമിനി ഫിലിം സര്ക്യൂട്ടും ചേര്ന്നാണ് ചിത്രത്തിന്റെ നിര്മ്മാണം.
അതേസമയം, തുപ്പരിവാലന് 2 ആണ് വിശാലിന്റെതായി ഇനി പുറത്താറിങ്ങാനിരിക്കുന്ന പുതിയ ചിത്രം. മിഷ്കിന് സംവിധാനം ചെയ്ത ‘തുപ്പരിവാലന്’ എന്ന ചിത്രത്തിന്റെ രണ്ടാം ഭാഗമാണിത്. ആദ്യ ഭാഗം സംവിധാനം ചെയ്തത് മിഷ്കിന് ആണെങ്കില് രണ്ടാം ഭാഗം സംവിധാനം ചെയ്യുന്നത് വിശാല് തന്നെയാണ്.