വിവാദങ്ങള്‍ക്കും വിലക്കുകള്‍ക്കുമിടെ ശ്രീനാഥ് ഭാസി നായകനാകുന്ന പുതിയ ചിത്രത്തിന്റെ ഷൂട്ടിംഗ് ആരംഭിച്ചു. ഏപ്രില്‍ 25ന് ആണ് ശ്രീനാഥ് ഭാസിയെയും ഷെയ്ന്‍ നിഗത്തെയും സിനിമാ സംഘടനകള്‍ വിലക്കിയത്. താരങ്ങള്‍ക്കെതിരെ നിര്‍മ്മാതാക്കള്‍ രംഗത്തെത്തിയിരുന്നു.
എന്നാല്‍ ശ്രീനാഥ് ഭാസിയെ പിന്തുണച്ചും പലരും രംഗത്തെത്തിയിരുന്നു. സോഹന്‍ സീനുലാല്‍ സംവിധാനം ചെയ്യുന്ന ‘ഡാന്‍സ് പാര്‍ട്ടി’ എന്ന സിനിമയിലാണ് ശ്രീനാഥ് ഭാസി അഭിനയിക്കാന്‍ ഒരുങ്ങുന്നത്. ശ്രീനാഥ് ഭാസിയെ വച്ച് ഇനിയും സിനിമ എടുക്കുമെന്ന് നടനും ചലച്ചിത്ര പ്രവര്‍ത്തകനുമായ വിജയകുമാര്‍ പ്രഭാകരനും പ്രഖ്യാപിച്ചിരുന്നു.
അതേസമയം, കൊച്ചി നഗരാതിര്‍ത്തിയില്‍ ഡാന്‍സും പാര്‍ട്ടിയുമൊക്കെയായി ജീവിക്കുന്ന ഒരു സംഘം ചെറുപ്പക്കാര്‍ക്കിടയില്‍ കടന്നു വരുന്ന ഒരു സംഭവവും അതിനെ തരണം ചെയ്യുവാനുള്ള ശ്രമങ്ങളുമാണ് അവതരിപ്പിക്കുന്നത്. സോഹന്‍ സീനുലാല്‍ തന്നെയാണ് ചിത്രത്തിന്റെ തിരക്കഥയും രചിച്ചിരിക്കുന്നത്.
വിഷ്ണു ഉണ്ണികൃഷ്ണന്‍, ശ്രീനാഥ് ഭാസി, ഷൈന്‍ ടോം ചാക്കോ, പ്രയാഗ മാര്‍ട്ടിന്‍, ലെന, സാജു നവോദയ, പുതുമുഖം ശ്രിന്ദ, നാരായണന്‍കുട്ടി എന്നിവര്‍ ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്. ബിജിബാല്‍ സംഗീതവും, ബിനു കുര്യന്‍ ഛായാഗ്രഹണവും, വി. സാജന്‍ എഡിറ്റിംഗും നിര്‍വഹിക്കുന്നു.
