പഴയ സഹപ്രവര്ത്തകയെ അപ്രതീക്ഷിതമായി കണ്ടതിന്റെ സന്തോഷത്തില് നടി ശ്വേത മേനോന്. സുഹൃത്തും കേന്ദ്രമന്ത്രിയുമായ സ്മൃതി ഇറാനിയെ അപ്രതീക്ഷിതമായി കണ്ടതിന്റെ സന്തോഷം ശ്വേത സോഷ്യല് മീഡിയയിലൂടെ പങ്കുവെച്ചു. സ്മൃതിക്കൊപ്പമുള്ള ചിത്രങ്ങള് താരം ഫെയ്സ്ബുക്കില് പങ്കുവെച്ചിട്ടുണ്ട്.
ഏതാണ്ട് 20 വര്ഷങ്ങള്ക്ക് മുമ്പ് തങ്ങള് ഒന്നിച്ച് തുടങ്ങിയതാണ് മോഡലിംഗ് എന്നും അവര്ക്ക് പക്ഷേ ഇപ്പോഴും ഒരു മാറ്റവുമില്ലെന്നും ശ്വേത ചിത്രം പങ്കുവെച്ച് കുറിച്ചു. അടുത്തിടെ ഒരു അഭിമുഖത്തില് സ്മൃതി ഇറാനിയെ അപ്രതീക്ഷിതമായി കണ്ടുമുട്ടിയതിനെ കുറിച്ച് ശ്വേത പറഞ്ഞിരുന്നു.
‘മുംബൈയില്നിന്ന് തിരുവനന്തപുരത്തേയ്ക്കുള്ള ഫ്ളൈറ്റ് വൈകിട്ട് അഞ്ചരയ്ക്കായിരുന്നു. എയര്പോര്ട്ടില് പതിവിലും നേരത്തെയെത്തി. ലോഞ്ചില്വച്ചാണ് അടുത്ത ബുക്ക്സ്റ്റാളില് പുസ്തകങ്ങള് തിരയുകയായിരുന്ന ആ സ്ത്രീയെ കണ്ടത്. നല്ല പരിചയമുള്ള മുഖം. പെട്ടെന്ന് ആളെ തിരിച്ചറിഞ്ഞു.’
‘പരിസരംപോലും മറന്ന് ഞാന് നീട്ടിവിളിച്ചു. ഹായ് സ്മൃതി. പെട്ടെന്ന് അവര്ക്ക് ചുറ്റുമുണ്ടായിരുന്ന ചിലര് എന്നെ തുറിച്ചുനോക്കി. അബദ്ധം പറ്റിയെന്ന് അപ്പോഴാണ് എനിക്ക് മനസിലായത്. അവരിന്ന് എന്റെ പഴയ സഹപ്രവര്ത്തകയല്ല, കേന്ദ്രമന്ത്രിയാണ്’ ശ്വേത പറഞ്ഞു.