വിക്രമിന്റെ സൂപ്പര്‍ഹിറ്റ് ചിത്രം സാമിയ്ക്ക് രണ്ടാംഭാഗമൊരുങ്ങുന്നതായുള്ള വാര്‍ത്തകള്‍ മുന്‍പ് തന്നെ പുറത്തു വന്നിരുന്നു. സാമിയിലെ നായിക തൃഷയെത്തന്നെയാണ് രണ്ടാം ഭാഗമായ സാമി സ്‌ക്വയറിലും നായികയായി നിശ്ചയിച്ചത്. എന്നാല്‍ നടി ഇതില്‍ നിന്നു പിന്മാറിയെന്നും നടിയ്‌ക്കെതിരെ നിര്‍മ്മാതാവ് താരസംഘടനയ്ക്കു പരാതിനല്‍കാന്‍ തയ്യാറെടുക്കുന്നതായും റിപ്പോര്‍ട്ടുകളുണ്ടായിരുന്നു.
ഇപ്പോള്‍ ഈ കാര്യത്തില്‍ ഒരു സ്ഥിരീകരണമുണ്ടായിരിക്കുന്നു. തനിയ്ക്ക് വന്‍ സാമ്പത്തിക നഷ്ടമുണ്ടായതായി കാണിച്ച് താരസംഘടനയ്ക്ക് നിര്‍മ്മാതാവ് ഷിബു തമീന്‍സ് പരാതി നല്‍കിയിയതായി തെലുങ്ക് ഓണ്‍ലൈന്‍ മാധ്യമമായ ചിത്രമാല വെളിപ്പെടുത്തുന്നു. കഥയും തിരക്കഥയും ഇഷ്ടമല്ല എന്ന് പറഞ്ഞ് അവസാന നിമിഷമാണ് നടി പിന്മാറിയത്.
ചിത്രീകരണം ആരംഭിക്കാന്‍ ഏതാനും ദിവസങ്ങള്‍ മാത്രം ബാക്കി നില്‍ക്കേ നടിയുടെ പിന്മാറ്റം തനിയ്ക്ക് വന്‍ സാമപത്തിക നഷ്ടമാണുണ്ടാക്കിയതെന്ന് പരാതിയില്‍ പറയുന്നു. വന്ന നഷ്ടം നടി തന്നെ നികത്തണമെന്നും നിര്‍മ്മാതാവ് ആവശ്യപ്പെടുന്നുണ്ട്. നടി കീര്‍ത്തി സുരേഷാണ് സാമി ടുവിലെ പുതിയ നായിക. നിലവില്‍ തമിഴ് സിനിമാരംഗത്ത് ഏറ്റവും താരമൂല്യമുള്ള നായികമാരില്‍ ഒരാളാണ് കീര്‍ത്തി.