വിജയ്യുടെ അവസാന ചിത്രം ‘ജനനായകനി’ല് മറ്റൊരു മലയാളി താരം കൂടി. നടി രേവതിയും സിനിമയില് ഉണ്ടാകും എന്ന റിപ്പോര്ട്ടുകളാണ് പുറത്തുവരുന്നത്. രേവതി വിജയ്യുടെ അമ്മയായിട്ടാണ് സിനിമയില് വേഷമിടുന്നത് എന്നാണ് റിപ്പോര്ട്ടുകള്. എന്നാല് ഇക്കാര്യം ഔദ്യോഗികമായി പ്രഖ്യാപിച്ചിട്ടില്ല.
35 വര്ഷത്തിന് ശേഷമാണ് രേവതി വിജയ് ചിത്രത്തിലെത്തുന്നത് എന്ന പ്രത്യേകതയുമുണ്ട്. 1990ല് പുറത്തിറങ്ങിയ തമിഴന് എന്ന ചിത്രത്തില് വിജയ്യുടെ സഹോദരിയായി രേവതി വേഷമിട്ടിരുന്നു. ഈ ചിത്രത്തില് നായികയായി എത്തിയത് പ്രിയങ്ക ചോപ്ര ആയിരുന്നു. അതേസമയം, എച്ച് വിനോദ് സംവിധാനം ചെയ്യുന്ന ജനനായകനില് പൂജ ഹെഗ്ഡെയാണ് നായിക.
മമിത ബൈജുവും ചിത്രത്തില് പ്രധാന കഥാപാത്രത്തെ അവതരിപ്പിക്കുന്നുണ്ട്. പ്രിയാമണി, പ്രകാശ് രാജ്, ഗൗതം വാസുദേവ് മേനോന് എന്നിവരാണ് ചിത്രത്തിലെ മറ്റ് പ്രധാന താരങ്ങള്. തെലുങ്ക് സൂപ്പര് താരം നന്ദമൂരി ബാലകൃഷ്ണയുടെ ‘ഭഗവന്ത് കേസരി’ എന്ന ചിത്രത്തിന്റെ കുറച്ച് ഭാഗങ്ങള് ജനനായകനില് റീമേക്ക് ചെയ്യുന്നുണ്ട്.
നാലര കോടിക്ക് ചിത്രത്തിന്റെ റീമേക്ക് അവകാശം വാങ്ങിയെന്ന് റിപ്പോര്ട്ടുകളുണ്ടായിരുന്നു. വിജയ്യുടെ ജന്മദിനമായ ജൂണ് 22 ന് ജനനായകന്റെ ടീസറോ ആദ്യ ഗാനമോ പുറത്തുവിടുമെന്നാണ് ട്വിറ്റര് ഫോറങ്ങള് റിപ്പോര്ട്ട് ചെയ്യുന്നത്. വിജയ് സജീവ രാഷ്ട്രീയത്തിലേക്ക് പ്രവേശിക്കുന്നതിന് മുന്നോടിയായി താരം അഭിനയിക്കുന്ന അവാസന ചിത്രമാണിത്.