ലോകേഷ് കനകരാജ്- വിജയ് കൂട്ടുകെട്ടിലിറങ്ങാൻ പോവുന്ന ‘ലിയോ’ സിനിമയ്ക്ക് വേണ്ടിയുള്ള കാത്തിരിപ്പിലാണ് ആരാധകലോകം. തെന്നിന്ത്യൻ സിനിമയിലെ നിലവിലുള്ള കളക്ഷൻ റെക്കോഡുകളെല്ലാം ചിത്രം തിരുത്തിക്കുമെന്ന പ്രതീക്ഷയിലാണ് വിജയ് ആരാധകർ.
എന്നാലിതാ റിലീസിന് മുൻപ് തന്നെ ഒരു റെക്കോർഡ് സൃഷ്ടിച്ചിരിക്കുകയാണ് ‘ലിയോ’. റിലീസിന് ആറാഴ്ച മുന്നേ തന്നെ യുകെയിൽ ബുക്കിംഗ് ആരംഭിച്ചിരുന്നു. ബുക്കിംഗ് ഇനത്തിൽ നിന്ന് മാത്രം രണ്ട് കോടി മുപ്പത്തിയൊന്ന് ലക്ഷം രൂപയ്ക്ക് പുറത്താണ് ലഭിച്ചത്.
യുകെയിലെ അഡ്വാൻസ് റിലീസ് കളക്ഷനിൽ രണ്ട്കോടി അൻപത്തിയാറ് ലക്ഷം രൂപയോടെ പൊന്നിയിൻ സെൽവൻ ആണ് ഒന്നാം സ്ഥാനത്ത്. രണ്ടാം സ്ഥാനത്ത് ലിയോയും, രണ്ട് കോടി ഇരുപത്തിയാറ് ലക്ഷം രൂപ നേടി ജയിലറുമാണ് മൂന്നാം സ്ഥാനത്ത്. വെറും 23 ദിവസങ്ങൾ കൊണ്ടാണ് ലിയോ റെക്കോർഡ് നേട്ടം കൈവരിച്ചിരിക്കുന്നത്. ട്രേഡ് അനലിസ്റ്റ് രാജശേഖർ ആണ് ബുക്കിംഗ് കളക്ഷൻ റിപ്പോർട്ട് ചെയ്തത്.
യുകെയിൽ സെൻസർ കട്ടുകൾ ഇല്ലാതെയാണ് ലിയോ എത്തുന്നത് എന്ന പ്രത്യേകതയും ഉണ്ട്. ഓരോ ഫ്രെയിമും പ്രധാനപ്പെട്ടതായത് കൊണ്ടാണ് കട്ടുകൾ ഇല്ലാതെ പ്രദർശിപ്പിക്കുന്നത് എന്നാണ് ചിത്രത്തിന്റെ യുകെയിലെ വിതരണക്കാരായ അഹിംസ എന്റർടെയ്ൻമെന്റ് പറയുന്നത്.