സംവിധായകന്‍ നെല്‍സണ്‍ ദിലീപ്കുമാറൊരുക്കുന്ന രജനികാന്തും ഒന്നിക്കുന്ന ചിത്രമാണ് ‘തലൈവര്‍ 169’. സിനിമയെക്കുറിച്ച് പുറത്തുവരുന്ന ഒരോ വാര്‍ത്തകളും വളരെ ആകാംക്ഷപൂര്‍വ്വമാണ് ആരാധകര്‍ ഉറ്റു നോക്കുന്നത്. ഇപ്പോഴിതാ സൂപ്പര്‍ഹിറ്റ് സംവിധായകന്‍ കെ എസ് രവികുമാറും സിനിമയുടെ ഭാഗമാകുന്നു എന്ന റിപ്പോര്‍ട്ടുകളാണ് പുറത്തുവരുന്നത്.
സിനിമയുടെ അധിക സ്‌ക്രിപ്റ്റ് റൈറ്റര്‍ ആയാവും കെ എസ് രവികുമാര്‍ എത്തുക എന്നാണ് ഇ ടൈംസ് റിപ്പോര്‍ട്ട് ചെയ്യുന്നത്.തലമുറവ്യത്യാസമില്ലാതെ എല്ലാവരെയും ഒരേ പോലെ തൃപ്തിപ്പെടുത്തുന്നതായിരിക്കണം സിനിമ എന്നതിനാലാണ് കെ എസ് രവികുമാര്‍ സിനിമയുടെ തിരക്കഥയില്‍ സഹായിക്കുന്നത്.
‘പടയപ്പ’, ‘മുത്തു’ തുടങ്ങിയ രജനികാന്തിന്റെ ഹിറ്റ് ചിത്രങ്ങള്‍ കെ എസ് രവികുമാര്‍ ആയിരുന്നു സംവിധാനം ചെയ്തത്. കന്നഡ താരം ശിവ രാജ്കുമാര്‍, ഐശ്വര്യ റായ്, രമ്യ കൃഷ്ണന്‍, പ്രിയങ്ക മോഹന്‍ എന്നിവരും ‘തലൈവര്‍ 169’ന്റെ ഭാഗമാകുമെന്ന് റിപ്പോര്‍ട്ടുകളുണ്ട്.
സണ്‍ പിക്ചേഴ്സ് ആണ് ചിത്രം നിര്‍മ്മിക്കുന്നത്.ചിത്രത്തിന്റെ സംഗീത സംവിധാനം അനിരുദ്ധ് രവിചന്ദറാണ്. നെല്‍സണും അനിരുദ്ധും ഒന്നിക്കുന്ന നാലാമത്തെ ചിത്രമാണിത്. രജനികാന്തിനൊപ്പം ഇത് മൂന്നാം തവണയാണ് അനിരുദ്ധ് ഒന്നിക്കുന്നത്.