സൂര്യയുടെ ‘ജയ് ഭീം’ ചിത്രത്തില് സെങ്കിനി എന്ന കഥാപാത്രത്തിന് പ്രചോദനമായ പാര്വതിക്ക് സഹായം പ്രഖ്യാപിച്ച് നടനും സംവിധായകനുമായ രാഘവ ലോറന്സ്. സിനിമയില് സെങ്കനിക്ക് നല്ല വീടും പണവും പ്രഖ്യാപിക്കുന്നതായാണ് കാണിക്കുന്നത്. എന്നാല് യഥാര്ത്ഥത്തില് അങ്ങനെയല്ല.
ചെന്നൈ പോരൂരിലെ ഓലമേഞ്ഞ കുടിലില് മകള്ക്കും മരുമകനും പേരക്കുട്ടികള്ക്കുമൊപ്പമാണ് പാര്വതി താമസിക്കുന്നത്. ഇതിന്റെ വാര്ത്തകള് മാധ്യമങ്ങളിലൂടെ അറിഞ്ഞ രാഘവ സഹായം വാഗ്ദാനം ചെയ്ത് രംഗത്തെത്തുകയായിരുന്നു. പാര്വതിക്കും കുടുംബത്തിനും പുതിയ വീട് നിര്മിച്ച് നല്കുമെന്ന് താരം അറിയിച്ചു.
”രാജാക്കണ്ണിന്റെ ഭാര്യയുടെ ഇപ്പോഴത്തെ അവസ്ഥ അറിഞ്ഞപ്പോള് അതിയായ ദുഖം തോന്നുന്നു. ചെയ്യാത്ത കുറ്റത്തിനാണ് രാജാക്കണ്ണും പാര്വതിയും പീഡിപ്പിക്കപ്പെട്ടത്. പാര്വതിക്ക് വീട് വച്ച് നല്കുമെന്ന് ഞാന് വാക്ക് നല്കുന്നു” എന്ന് രാഘവ ലോറന്സ് വ്യക്തമാക്കി.
പൊലീസ് കള്ളക്കേസ് ചുമത്തി ലോക്കപ്പ് മര്ദ്ദനത്തിന് വിധേയമാക്കിയ തന്റെ ഭര്ത്താവിനെ അന്വേഷിച്ച്, നീതി തേടി ഇറങ്ങിയ ഇരുള വിഭാഗത്തില് പെട്ട സെങ്കണി എന്ന യുവതിയുടെയും അവര്ക്ക് വേണ്ടി പ്രവര്ത്തിച്ച ചന്ദ്രുവെന്ന അഭിഭാഷകന്റെയും പോരാട്ടത്തിന്റെ കഥയാണ് ജയ് ഭീം പറയുന്നത്.