നടി പ്രിയങ്ക മോഹന്‍ പങ്കെടുത്ത ഉദ്ഘാടന പരിപാടിയുടെ സ്റ്റേജ് തകര്‍ന്ന് അപകടം. പ്രിയങ്ക മോഹനും മറ്റ് അതിഥികളും നില്‍ക്കുമ്പോള്‍ പെട്ടെന്ന് സ്റ്റേജ് തകര്‍ന്ന് വീഴുകയായിരുന്നു. ഒരു ടെക്‌സ്റ്റെയില്‍ ഷോപ്പിന്റെ ഉദ്ഘാടനത്തിനിടെയാണ് അപകടം നടന്നത്. തെലങ്കാനയിലെ തൊരൂര്‍ ആണ് സംഭവം നടന്നത്.
ഉദ്ഘാടനത്തിനിടെ വേദി തകര്‍ന്ന് വീഴുന്ന വീഡിയോ സോഷ്യല്‍ മീഡിയയില്‍ വൈറലായിട്ടുണ്ട്. അപകടത്തില്‍ നിന്ന് അദ്ഭുതകരമായി രക്ഷപ്പെട്ടെന്ന് പ്രിയങ്ക മോഹന്‍ എക്‌സ് പ്ലാറ്റ്‌ഫോമില്‍ പങ്കുവച്ച കുറിപ്പില്‍ വ്യക്തമാക്കി. ആശങ്കപ്പെടുന്നത് പോലെ വലിയ പരിക്കുകളൊന്നും പറ്റിയില്ല, ഭാഗ്യം കൊണ്ടാണ് രക്ഷപ്പെട്ടത് എന്നാണ് പ്രിയങ്ക പറയുന്നത്.
അപകടത്തില്‍ പരിക്കേറ്റവര്‍ എത്രയും വേഗത്തില്‍ സുഖം പ്രാപിക്കട്ടെ എന്നും പ്രിയങ്ക കുറിച്ചു. ഇത്തരം പരിപാടികള്‍ സംഘടിപ്പിക്കുന്നവര്‍ അതില്‍ പങ്കെടുക്കുന്നവരുടെ സുരക്ഷ കൂടി ഉറപ്പുവരുത്തണമെന്നാണ് സോഷ്യല്‍ മീഡിയയില്‍ ഉയരുന്ന അഭിപ്രായം.
പരിപാടിക്ക് അനുമതി കൊടുക്കുന്നവര്‍ സംഘാടകര്‍ സുരക്ഷാമാനദണ്ഡങ്ങള്‍ പാലിക്കുന്നുണ്ടോയെന്നും ഉറപ്പു വരുത്തണമെന്ന് ആരാധകര്‍ അഭിപ്രായപ്പെട്ടു. അതേസമയം, ബ്രദര്‍ എന്ന ചിത്രമാണ് നടിയുടെതായി ഇനി പുറത്തിറങ്ങാനിരിക്കുന്നത്. നിലാവുക്കു എന്‍ മേല്‍ എന്നടി കൊമ്പം, ദെയ് കോള്‍ ഹിം ഒജി എന്നീ ചിത്രങ്ങളാണ് നടിയുടെതായി ഒരുങ്ങുന്നത്.
