പുതിതായി വാങ്ങിയ റേഞ്ച് റോവറിന് ഫാന്‍സി നമ്പര്‍ ഒഴിവാക്കി ആ പണം പ്രളയ ദുരിതാശ്വാസത്തിന് നല്‍കി നടന്‍ പൃഥ്വിരാജ്. ഫാന്‍സി നമ്പര്‍ ലഭിക്കുന്നതിനായി പൃഥ്വി എറണാകുളം ആര്‍ടിഒ ഓഫീസില്‍ രജിസ്റ്റര്‍ ചെയ്തിരുന്നു. എന്നാല്‍, ലേലത്തില്‍ നിന്ന് പിന്മാറി ആ തുക ദുരിതാശ്വാസത്തിനായി നല്‍കാന്‍ തീരുമാനിക്കുകയായിരുന്നു പൃഥ്വി.
KL 07 CS 7777 എന്ന നമ്പറായിരുന്നു പൃഥ്വിരാജ് പുതിയ വാഹനത്തിനായി റിസര്‍വ് ചെയ്തിരുന്നത്. ഇതേ നമ്പറിനായി മറ്റു പലരും രംഗത്തുള്ളതിനാല്‍ ലേലം വിളിക്കാനുള്ള ഒരുക്കത്തിലായിരുന്നു ആര്‍ടിഒ ഓഫീസ്. എന്നാല്‍, നമ്പര്‍ റിസര്‍വേഷന്‍ റദ്ദാക്കുകയാണെന്നും ആ തുക പ്രളയദുരിതാശ്വാസത്തിന് നല്‍കാനാണ് തീരുമാനമെന്നും പൃഥ്വി പറഞ്ഞതായി എറണാകുളം ആര്‍ടിഒ കെ.മനോജ്കുമാര്‍ പറഞ്ഞു.
റേഞ്ച് റോവറിന് മുന്‍പ് സ്വന്തമാക്കിയ ലംബോര്‍ഗിനിയ്ക്ക് ഇഷ്ട നമ്പര്‍ ആറു ലക്ഷം രൂപ മുടക്കിയായിരുന്നു് പൃഥി സ്വന്തമാക്കിയത്. ഇത്തവണ ചേട്ടന്‍ ഇന്ദ്രജിത്തിന്റെയും കുടുംബത്തിന്റെയും അന്‍പൊടു കൊച്ചിയുടെ പ്രവര്‍ത്തനങ്ങളില്‍ പൃഥ്വിരാജും ഭാഗമായിരുന്നു. പൃഥ്വിയുടെ വക വയനാട്ടിലേക്ക് ഒരു ട്രക്ക് നിറയെ സാധനങ്ങളാണ് അന്‍പൊടു കൊച്ചി കൈമാറിയത്. കഴിഞ്ഞ പ്രളയ സമയത്തും പൃഥ്വി സഹായവുമായി രംഗത്ത് വന്നിരുന്നു.
