പിറന്നാള് ദിനത്തില് പൃഥ്വിരാജിന് ആശംസകള് നേരുകയാണ് സിനിമാലോകം. നടന്റെ പിറന്നാളിനോട് അനുബന്ധിച്ച് സിനിമാപ്രേമികള് ഏറെ പ്രതീക്ഷയോടെ കാത്തിരിക്കുന്ന ‘എമ്പുരാന്’ ചിത്രത്തിന്റെത് അടക്കമുള്ള അപ്ഡേറ്റുകളും എത്തുന്നുണ്ട്. ഇതിനിടെ നിര്മ്മാതാവ് ആന്റണി പെരുമ്പാവൂരിന്റെ ആശംസകള്ക്ക് പൃഥ്വിരാജ് നല്കിയ മറുപടിയാണ് സോഷ്യല് മീഡിയയില് ശ്രദ്ധ നേടിക്കൊണ്ടിരിക്കുന്നത്.
‘പിറന്നാള് ആശംസകള് പ്രിയപ്പെട്ട രാജൂ… ഇനിയും ഒത്തിരി നാഴികക്കല്ലുകളും മഹത്തായ നിമിഷങ്ങളും നിനക്കുണ്ടാവട്ടേ’ എന്നാണ് ആന്റണി പെരുമ്പാവൂര് പൃഥ്വിയുടെ ചിത്രം പങ്കുവച്ച് ക്യാപ്ഷനായി കുറിച്ചത്. ഈ പോസ്റ്റിന് നന്ദി പറഞ്ഞെത്തിയ പൃഥ്വിരാജ് ‘ആ ഹെലികോപ്ടറിന്റെ കാര്യം… ‘ എന്ന് കൂടി ആന്റണിയോട് സൂചിപ്പിക്കുകയായിരുന്നു.
ഇതോടെ കമന്റ് ബോക്സ് നിറയെ രാജുവേട്ടന് ആ ഹെലികോപ്റ്റര് അങ്ങ് കൊടുക്കാന് പറഞ്ഞുള്ള ബഹളവുമായി എത്തിയിരിക്കുകയാണ് ആരാധകര്. എല്ലാം എമ്പുരാന് വേണ്ടിയല്ലേ, കാശ് ഇറക്കി കളിക്കൂ… രാജുവേട്ടന് ഒരു ആഗ്രഹം പറഞ്ഞാല് ആന്റണി ചേട്ടനത് ചെയ്തിരിക്കും എന്നിങ്ങനെയാണ് ചില കമന്റുകള്.
അതേസമയം, പൃഥ്വിരാജിന്റെ കഥാപാത്രമായ സയീദ് മസൂദിന്റെ ക്യാരക്ടര് പോസ്റ്റര് പുറത്ത് വന്നിട്ടുണ്ട്. ലൂസിഫര് എന്ന ചിത്രത്തില് സയീദ് മസൂദ് എന്ന കഥാപാത്രത്തെയാണ് പൃഥ്വിരാജ് അവതരിപ്പിച്ചത്. അതേ റോളില് എമ്പുരാനില് പൃഥ്വിയും ഉണ്ടാവും. ‘ദൈവത്താല് ഉപേക്ഷിക്കപ്പെട്ടു… ചെകുത്താന് വളര്ത്തി’ എന്നാണ് കഥാപാത്രത്തിന് പോസ്റ്ററില് നല്കിയിരിക്കുന്ന വിശേഷണം.