പ്രശസ്ത തെന്നിന്ത്യന്‍ യുവഗായകന്‍ സിദ് ശ്രീറാം ആലപിച്ച “ഇഷ്‌ക്” എന്ന ചിത്രത്തിലെ ഗാനം പുറത്തിറങ്ങി. പറയുവാന്‍ ഇതാദ്യമായ്…എന്നു തുടങ്ങുന്ന ഗാനത്തിന്റെ ലെറിക്കല്‍ വീഡിയോയാണ് പുറത്തിറങ്ങിയത്. നടന്‍ പൃഥ്വിരാജാണ് തന്റെ ഒഫീഷ്യല്‍ ഫെയ്‌സ്ബുക്ക് പേജിലൂടെ ഗാനം റിലീസ് ചെയ്തത്. ഇന്‍കേം ഇന്‍കേം… എന്ന ഹിറ്റ് ഗാനം പാടിയ സിദ് ശ്രീറാം ആദ്യമായി മലയാളത്തില്‍ പാടിയ ഗാനമാണിത്. നേഹ എസ് നായരിനൊപ്പമാണ് സിദ് ഈ ഗാനം ആലപിച്ചിരിക്കുന്നത്. ജോ പോളിന്റെ വരികള്‍ക്ക് ജേക്‌സ് ബിജോയ് ഈണം പകര്‍ന്നിരിക്കുന്നു.
ഷൈന്‍ നിഗമിനെ നായകനാക്കി അനുരാജ് മനോഹര്‍ സംവിധാനം ചെയ്യുന്ന ചിത്രമാണ് ഇഷ്‌ക്. രതീഷ് രവി തിരക്കഥയൊരുക്കുന്ന ചിത്രം “നോട്ട് എ ലവ് സ്റ്റോറി” എന്ന ടാഗ് ലൈനോടെയാണ് ഒരുങ്ങുന്നത്. കൊച്ചിക്കാരനായ സച്ചിദാനന്ദനും കോട്ടയംകാരിയായ വസുധയും തമ്മില്‍ ഫെയ്‌സ്ബുക്കിലൂടെ പരിചയപ്പെടുന്നതും തുടര്‍ന്ന് ഇരുവര്‍ക്കുമിടയിലുണ്ടാകുന്ന പ്രണയവും തുടര്‍ന്നുണ്ടാകുന്ന സംഭവവികാസങ്ങളുമാണ് കഥ. സച്ചിദാനന്ദനായി ഷെയിന്‍ നിഗമും വസുധയായി ആന്‍ ശീതളും അഭിനയിക്കുന്നു.
തന്റെ സ്വാഭാവികമായ അഭിനയത്തിലൂടെ, തുടര്‍ച്ചയായ ഹിറ്റുകളുമായി സിനിമാ കരിയര്‍ കെട്ടിപ്പടുത്ത ഷെയ്‌നിന്റെ പുതിയ ചിത്രത്തെ ഏറെ പ്രതീക്ഷയോടെയാണ് ആരാധകര്‍ കാത്തിരിക്കുന്നത്. മുകേഷ് ആര്‍ മേത്ത, എ.വി അനൂപ്, സി.വി സാരതി എന്നിവരാണ് ചിത്രം നിര്‍മ്മിക്കുന്നത്. മെയ് 17 ന് ചിത്രം തിയേറ്ററുകളിലെത്തും.