സഞ്ജയ് ലീല ബന്‍സാലിയുടെ സംവിധാനത്തിലൊരുങ്ങിയ പദ്മാവത് എന്ന ചിത്രവും അതിലെ ഖൂമര്‍ ഡാന്‍സും രാജ്യമൊട്ടാകെ വലിയ വിവാദങ്ങള്‍ക്കാണ് വഴിതുറന്നത്. രജപുത്ര രാജകുമാരിയെ പരിഹസിക്കുകയും മോശക്കാരിയായും ചിത്രീകരിക്കുകയാണ് നൃത്തത്തിലും സിനിമയിലുമെന്ന് ആരോപണം ഉയര്‍ന്നു വരികയും ചിത്രത്തിന്റെ റിലീസ് അനുവദിയ്ക്കരുതെന്ന് ആവശ്യപ്പെട്ട് രജപുത്ര സംഘടനകള്‍ കോടതിയെ സമീപിക്കുകയും ചെയ്തിരുന്നു.
ഇപ്പോഴിതാ ഈ പ്രതിഷേധങ്ങളെയും വിവാദങ്ങളെയും നിഷ്പ്രഭമാക്കി കൊണ്ട് അമേരിക്കയില്‍ നിന്ന് ഒരു വാര്‍ത്ത. ഈ ജനുവരി 28 ന് അമേരിക്കയില്‍ നടന്ന എന്‍ബിഎ ബാസ്‌ക്കറ്റ് ബോള്‍ ഗെയിമിയില്‍ ചിയര്‍ ഡാന്‍സായി പത്മാവതില്‍ ദീപിക പദുകോണ്‍ ചുവടുവച്ച ഖൂമര്‍ നൃത്തമാണ് അവതരിപ്പിച്ചത്.
ജനുവരി 25 ന് തീയേറ്ററുകളിലെത്തിയ പത്മാവതില്‍ ദീപികയ്ക്കു പുറമേ രണ്‍വീര്‍ സിങ്, ഷാഹിദ് കപൂര്‍ എന്നിവരാണ് പ്രധാനവേഷത്തിലെത്തിയത്. ആദ്യപ്രദര്‍ശനത്തില്‍ 19 കോടിയും തുടര്‍ന്നുള്ള ദിനങ്ങളില്‍ 32, 27 കോടിയും സമാഹരിച്ച ഈ ചിത്രം 83 കോടി രൂപയാണ് ഇതു വരെ നേടിയത്.