തെന്നിന്ത്യൻ സിനിമ ലോകം ഏറ്റവും കൂടുതൽ കാത്തിരിക്കുന്ന ചിത്രമാണ് ലോകേഷ് കനകരാജ്- വിജയ് കൂട്ടുക്കെട്ടിലിറങ്ങുന്ന ലിയോ. ലിയോ എൽസിയുവിൽ ഉൾപ്പെടുമോ എന്ന ചോദ്യത്തിനും ചിത്രം പുറത്തിറങ്ങുന്നതോടെ ഉത്തരം കിട്ടുംഎന്നാണ് ആരാധകർ വിശ്വസിക്കുന്നത്.
എന്നാൽ ഇപ്പോൾ അതൊന്നുമല്ല പ്രധാന ചർച്ച. കമൽ ഹാസനെ നായകനാക്കി ലോകേഷ് കനകരാജ് സംവിധാനം ചെയ്ത വിക്രം എന്ന സിനിമയിലെ ഏജന്റ് ടീനയെ പ്രേക്ഷകർ ആരും മറന്നുകാണില്ല. തിയേറ്ററുകൾ ഇളക്കിമറിച്ച ഒരു ക്യാരക്ടർ ട്രാൻസ്ഫോർമേഷനായിരുന്നു ഏജന്റ് ടീനയുടേത്.ഇപ്പോഴിതാ ആ കഥാപാത്രത്തെ വെച്ച് ഒരു വെബ് സീരീസ് പുറത്തുവരും എന്ന് പ്രഖ്യാപിച്ചിരിക്കുകയാണ് ലോകേഷ് കനകരാജ്.
“ഏജന്റ് ടീനയുടെ റോൾ പ്രേക്ഷകരെ ശരിക്കും ഞെട്ടിച്ചിരുന്നു. ചിത്രത്തിൽ അവർ കൊല്ലപ്പെടുന്നുണ്ട്. എന്നാൽ ഇവരുടെ മുൻകാല കഥയായിരിക്കും വെബ് സീരീസിൽ വരുന്നത്. തിരക്കഥ ഞാനായിരിക്കും എഴുതുന്നത്. സംവിധാനം ചെയ്യുന്നത് ആരാണെന്ന് തീരുമാനമായിട്ടില്ല.” ഒരു തമിഴ് ചാനലിന് നൽകിയ അഭിമുഖത്തിലാണ് ലോകേഷ് കനകരാജ് ഇങ്ങനെ പറഞ്ഞത്.
സിനിമയിൽ കൊറിയോഗ്രാഫി അസിസ്റ്റന്റ് ആയിരുന്ന വാസന്തിയാണ് ഏജന്റ് ടീന എന്ന കഥാപാത്രത്തെ അവതരിപ്പിച്ചത്. എന്തായാലും വെബ് സീരീസിന്റെ ഔദ്യോഗിക പ്രഖ്യാപനത്തിന് വേണ്ടി കാത്തിരിക്കുകയാണ് തെന്നിന്ത്യൻ സിനിമ ലോകം.