ലാൽ ജോസ് സംവിധാനവും നിർമാണവും നിര്വ്വഹിക്കുന്ന ചിത്രം സോളമന്റെ തേനീച്ചകളുടെ ഫസ്റ്റ് ക്യാരക്ടർ ഇൻട്രഡക്ഷൻ വീഡിയോ പുറത്തു വിട്ടു. നായിക നായകൻ എന്ന റിയാലിറ്റി ഷോയിലൂടെ വിജയിയായ ശംഭു അവതരിപ്പിക്കുന്ന കഥാപാത്രത്തിന്റെ ക്യാരക്ടർ ഇൻട്രഡക്ഷൻ വീഡിയോയാണ് പുറത്തുവിട്ടിരിക്കുന്നത്. ശരത്ത് എന്ന കഥാപാത്രത്തെയാണ് ചിത്രത്തിൽ ശംഭു അവതരിപ്പിക്കുന്നത്. മഴവിൽ മനോരമയിലെ നായികാ നായകൻ റിയാലിറ്റി ഷോയിലെ വിജയികൾ പ്രധാന വേഷങ്ങളിൽ എത്തുന്ന ചിത്രമാണിത്.
ശംഭു , ദർശന , ആഡിസ്, വിൻസി എന്നീ റിയാലിറ്റി ഷോ വിജയികൾക്കൊപ്പം ജോജു ജോർജ് പ്രധാന കഥാപാത്രത്തെ അവതരിപ്പിക്കുന്നു. റിയാലിറ്റി ഷോയ്ക്ക് ശേഷം ശംഭു ആദ്യമായി എത്തുന്ന ചിത്രം കൂടിയാണിത്. എൽ ജെ ഫിലിംസിന്റെ ബാനറിൽ ലാൽജോസ് തന്നെയാണ് ചിത്രം നിർമിക്കുന്നത്. പി ജി പ്രഗീഷ് ആണ് ചിത്രത്തിന്റെ രചന. പശ്ചാത്തലസംഗീതവും ഒരുക്കുന്നത് വിദ്യാസാഗർ ആണ്.
അജ്മൽ സാബു ആണ് ചിത്രത്തിന് ക്യാമറ . എഡിറ്റർ – രഞ്ജൻ എബ്രഹാം. ലാൽ ജോസിന്റെ ചിത്രമായി അവസാനം എത്തിയത് മ്യാവു ആയിരുന്നു. ഇഖ്ബാൽ കുറ്റിപ്പുറം രചിച്ച് സൗബിൻ ഷാഹിർ നായകനായി എത്തിയ ചിത്രത്തിൽ മംമ്ത മോഹൻദാസ് ആയിരുന്നു നായിക. ഒൻപതു വർഷത്തെ ഇടവേളയ്ക്കു ശേഷം ലാൽ ജോസ് വിദ്യാസാഗർ ഒന്നിക്കുന്ന ചിത്രം കൂടിയാണിത്.
സംവിധായകൻ ലാൽജോസ്, നടൻ കുഞ്ചാക്കോ ബോബൻ, നടി സംവൃത സുനിൽ എന്നിവരടങ്ങുന്ന ജൂറിയാണ് എഴപത്തിയഞ്ച് എപ്പിസോഡുകളായി സംപ്രേഷണം ചെയ്ത റിയാലിറ്റി ഷോയിലൂടെ വിജയികളെ കണ്ടെത്തിയത്.