സാഗര് തിരക്കഥയും സംവിധാനവും ചെയ്യുന്ന പുതിയ ചിത്രം ‘കനകരാജ്യ’ത്തിന്റെ പൂജ കഴിഞ്ഞു. കൊട്ടാരക്കര മഹാദേവ ക്ഷേത്രത്തില് വച്ചായിരുന്നു പൂജ ചടങ്ങുകള്. അണിയറ പ്രവര്ത്തകരും ബന്ധുമിത്രാദികളും പങ്കെടുത്ത ലളിതമായി നടന്ന ചടങ്ങില് നിര്മ്മാതാവ് വിനായക അജിത്ത് ഭദ്രദീപം തെളിയിച്ചതോടെയാണ് ചിത്രീകരണത്തിന് തുടക്കമായത്.
വിനായക അജിത്ത് സിനിമയുടെ സ്വിച്ച് ഓണ് കര്മ്മവും സംവിധായകന് സാഗറിന്റെ പിതാവ് ഹരിക്കുട്ടന് ഫസ്റ്റ് ക്ലാപ്പും നല്കി. രണ്ടു വര്ഷങ്ങള്ക്കു മുമ്പ് ആലപ്പുഴയില് നടന്ന രണ്ടു സംഭവങ്ങളെ കോര്ത്തിണക്കിയാണ് ചിത്രമൊരുങ്ങുന്നത്.
തികച്ചും റിയലിസ്റ്റിക്കായി അവതരിപ്പിക്കുന്ന ചിത്രത്തില് വാണിജ്യ ഘടകങ്ങളെ പൂര്ണമായും ഒഴിവാക്കിക്കൊണ്ടാണ് അവതരിപ്പിക്കുന്നതെന്ന് സംവിധായകന് സാഗര് പറഞ്ഞു. ഇന്ദ്രന്സ്, മുരളി ഗോപീ എന്നിവരാണ് പ്രധാനകഥാപാത്രങ്ങള്. ഇന്ദ്രന്സ്, ജോളി, ആതിരാ പട്ടേല് എന്നിവര് പങ്കെടുത്ത രംഗത്തോടെയാണ് ചിത്രീകരണം ആരംഭിച്ചത്. ‘സത്യം മാത്രമേ ബോധിപ്പിക്കൂ’, ‘വീകം’ എന്നീ ചിത്രങ്ങളുടെ സംവിധായകനാണ് സാഗര്. ശ്രീജിത്ത് രവി, ദിനേശ് പ്രഭാകര്, കോട്ടയം രമേഷ്, രാജേഷ് ശര്മ്മ, ഉണ്ണിരാജ്, അച്ചുതാനന്ദന്, ജയിംസ് ഏല്യാ, ഹരീഷ് പെങ്ങന്, രമ്യാ സുരേഷ്, സൈനാ കൃഷ്ണ, ശ്രീവിദ്യാ മുല്ലശ്ശേരി തുടണിയവരും പ്രധാനവേഷങ്ങളിലെത്തുന്നു.
ഹരി നാരായണന്റെ വരികള്ക്ക് അരുണ് മുരളിധരന് ഈണം പകര്ന്നിരിക്കുന്നു. കൊട്ടാരക്കരയ്ക്ക് അടുത്തുള്ള ചീരങ്കാവ്, മാറനാട്, എഴുകോണ്, നെടുവത്തൂര്, കുണ്ടറ ഭാഗങ്ങളിലായിട്ടാണ് ചിത്രത്തിന്റെ ചിത്രീകരണം നടക്കുക. ഈ പ്രദേശത്തു നടക്കുന്ന ആദ്യ സിനിമാ ചിത്രീകരണവും ഇതാണ്.