മോഹന്ലാലിന്റെ പാന് ഇന്ത്യ ചിത്രം ‘വൃഷഭ’യുടെ ആദ്യ ഷെഡ്യൂള് അവസാനിച്ചു. ചിത്രത്തിലെ തന്റെ ലുക്ക് പുറത്തുവിട്ട് മോഹന്ലാല് തന്നെയാണ് ഇക്കാര്യം അറിയിച്ചിരിക്കുന്നത്. യോദ്ധാവിന് സമാനമായി കയ്യില് വാളേന്തി നില്ക്കുന്ന മോഹന്ലാലിനെ ചിത്രത്തില് കാണാം.
മോഹന്ലാലിന്റെ സൂപ്പര് ഹിറ്റ് ചിത്രം ‘യോദ്ധ’ ഓര്മവരുന്നുവെന്നാണ് ലുക്ക് കണ്ട് ആരാധകര് പറയുന്നത്. ‘ബാഹുബലി’ വേര്ഷന് ആണോയെന്നും ചിലര് ചോദിക്കുന്നുണ്ട്. ചിത്രത്തിലെ അഭിനേതാക്കളുടെയെല്ലാം ചിത്രങ്ങളും മോഹന്ലാല് പങ്കുവച്ചിട്ടുണ്ട്. തെലുങ്കിലും മലയാളത്തിലുമായാണ് ചിത്രത്തിന്റെ നിര്മ്മാണം.
തമിഴ്, കന്നഡ, ഹിന്ദി ഭാഷകളിലും മൊഴിമാറ്റംചെയ്ത് അടുത്തവര്ഷം രാജ്യമൊട്ടാകെ റിലീസ് ചെയ്യും. ഏകതാ കപുറിന്റെ ബാലാജി ടെലിഫിലിംസ്, കണക്റ്റ് മീഡിയ, എ.വി.എസ്. സ്റ്റുഡിയോ എന്നിവയുടെ സഹകരണത്തിലൊരുക്കുന്ന ചിത്രം സംവിധാനം ചെയ്യുന്നത് നന്ദകിഷോര് ആണ്.
റോഷന് മേക്ക, ഷനായ കപുര്, സഹ്റ എസ്. ഖാന് എന്നിവരും അഭിനയിക്കുന്നു. 200 കോടി ബജറ്റിലാണ് ചിത്രം ഒരുങ്ങുന്നത് എന്നാണ് റിപ്പോര്ട്ട്. സഹ്റ എസ് ഖാന് നായികയായി അഭിനയിക്കുന്ന ആദ്യ പാന് ഇന്ത്യന് ചിത്രം എന്ന പ്രത്യേകതയും വൃഷഭയ്ക്കുണ്ട്.
ഒരു ആക്ഷന് എന്റര്ടൈനര് ചിത്രമായിരിക്കും വൃഷഭ. ഇമോഷന്സ് കൊണ്ടും വിഎഫ്എക്സ് കൊണ്ടും മികച്ച ദൃശ്യാവിഷ്ക്കാരം പ്രേക്ഷകര്ക്ക് സമ്മാനിക്കുന്നൊരു സിനിമയായിരിക്കും ഇതെന്നാണ് അണിയറപ്രവര്ത്തകരുടെ അവകാശവാദം. 2024ല് ചിത്രം റിലീസിനെത്തും.