ചായക്കട നടത്തി 25 ലോകരാജ്യങ്ങളില്‍ ചുറ്റിക്കറങ്ങിയ വൃദ്ധദമ്പതിമാരെ വീട്ടിലേക്ക് ക്ഷണിച്ച് നടന്‍ മോഹന്‍ലാല്‍. കൊച്ചി ഗാന്ധി നഗറില്‍ ശ്രീ ബാലാജി എന്ന കോഫി ഹൗസ് നടത്തി ഈജിപ്ത്, സിങ്കപ്പൂര്‍, സ്വിറ്റ്സര്‍ലാന്റ് തുടങ്ങിയ രാജ്യങ്ങളിലേക്കെല്ലാം യാത്ര നടത്തിയ കെ ആര്‍ വിജയന്‍ എന്ന ബാലാജിയും ഭാര്യ മോഹനയുമാണ് ലാലിന്റെ ക്ഷണം സ്വീകരിച്ച് പ്രിയതാരത്തിന്റെ വീട്ടിലെത്തിയിരിക്കുന്നത്.
അവര്‍ക്കൊപ്പം ഒരു ദിവസം ചെലവഴിക്കാനായതിന്റെ സന്തോഷം സോഷ്യല്‍മീഡിയയിലൂടെ പങ്കുവെച്ചിരിക്കുകയാണ് മോഹന്‍ലാല്‍.
“”അതിശയിപ്പിക്കും ഈ ദമ്പതിമാര്‍.. വിജയനും മോഹന വിജയനും. തങ്ങളുടെ പരിമിതികളെ മുഴുവന്‍ മറികടന്ന് ഇരുപത്തിയഞ്ചോളം രാജ്യങ്ങളില്‍ സഞ്ചരിച്ചിട്ടുളളവര്‍.. അതും കൊച്ചി ഗാന്ധി നഗറിലെ ശ്രീ ബാലാജി എന്ന ചെറിയൊരു കോഫി ഹൗസ് നടത്തിയിട്ട്.. ഇവരെ വീട്ടിലേക്ക് വിളിക്കാനായതിലാണ് എനിക്കിന്ന് ആനന്ദം… ഇവരെനിക്കായി ഭക്ഷണവുമായാണ് വന്നിരിക്കുന്നത്.. ഏവര്‍ക്കും പ്രചോദനമാണ് ഇവര്‍..”” ദമ്പതിമാര്‍ക്കൊപ്പം എടുത്ത ചിത്രത്തോടൊപ്പം മോഹന്‍ലാല്‍ ഫെയ്‌സ്ബുക്കില്‍ കുറിച്ചിരിക്കുന്നത്.