സിബിഐ സീരിസിലെ അഞ്ചാമത്തെ ചിത്രത്തിന്റെ ഷൂട്ടിംഗ് പുരോഗമിക്കുകയാണ്. സേതുരാമയ്യരുടെ അഞ്ചാം വരവില് എന്തെങ്കിലും മാറ്റങ്ങളോ വ്യത്യാസങ്ങളോ ഉണ്ടോ എന്ന് അറിയാനുള്ള കാത്തിരിപ്പിലാണ് സിനിമാപ്രേമികള്. ചിത്രത്തിന്റെ ലൊക്കേഷനില് നിന്നുള്ള ഒരു ചിത്രമാണ് മമ്മൂട്ടി ഇപ്പോള് പങ്കുവച്ചിരിക്കുന്നത്.
മുഖം വ്യക്തമാവാത്ത തരത്തില് സേതുരാമയ്യരുടെ പിന്നില് നിന്നുള്ള ഒരു മിഡ് ഷോട്ട് ആണ് മമ്മൂട്ടി പങ്കുവച്ചിരിക്കുന്നത്. ‘ഒഫിഷ്യല് ലീക്ക്!’ എന്നാണ് ചിത്രത്തിന് മമ്മൂട്ടി നല്കിയിരിക്കുന്ന ക്യാപ്ഷന്. അതേസമയം ചിത്രത്തിന്റെ പേര് ഇനിയും പ്രഖ്യാപിച്ചിട്ടില്ല.
എന്.എന് സ്വാമിയുടെ തിരക്കഥയില് കെ മധു ആണ് സിബിഐ 5 ഒരുക്കുന്നത്. നവംബര് 29ന് ആണ് സിബിഐ 5ന്റെ ചിത്രീകരണം ആരംഭിച്ചത്. സ്വര്ഗചിത്ര അപ്പച്ചനാണ് ചിത്രം നിര്മ്മിക്കുന്നത്. സിബിഐയുടെ ഐക്കോണിക് തീം മ്യൂസിക് ഒരുക്കുന്നത് ജേക്സ് ബിജോയ് ആണ്.
1988-ല് പുറത്തിറങ്ങിയ ഒരു സിബിഐ ഡയറിക്കുറിപ്പ് എന്ന ചിത്രത്തിലൂടെയാണ് സിബിഐ സീരീസ് ആരംഭിച്ചത്. തുടര്ന്ന് ജാഗ്രത, സേതുരാമയ്യര് സിബിഐ, നേരറിയാന് സിബിഐ തുടങ്ങിയ സിനിമകളും ഈ സീരീസിലേതായി പുറത്തിറങ്ങി. സേതുരാമയ്യര് എന്ന സിബിഐ ഉദ്യോഗസ്ഥനും അദ്ദേഹം അന്വേഷിക്കുന്ന കേസുകളും സിനിമകളുടെ പ്രമേയം.
രഞ്ജി പണിക്കര്, അനൂപ് മേനോന്, സായ്കുമാര്, സൗബിന് ഷാഹിര്, ദിലീഷ് പോത്തന്, പ്രശാന്ത് അലക്സാണ്ടര്, ജയകൃഷ്ണന്, സുദേവ് നായര്, അസീസ് നെടുമങ്ങാട്, സന്തോഷ് കീഴാറ്റൂര്, ഇടവേള ബാബു, കോട്ടയം രമേശ്, സുരേഷ് കുമാര്, ആശാ ശരത്ത്, അന്നാ രേഷ്മ രാജന്, അന്സിബ ഹസന്, മാളവിക മേനോന്, മാളവിക നായര്, സ്വാസിക എന്നിവരാണ് മറ്റു പ്രധാന അഭിനേതാക്കള്.