സ്വന്തം റെക്കോഡ് തിരുത്തിയെഴുതി മെഗാസ്റ്റാര്‍ മമ്മൂട്ടി. ആദ്യദിന കളക്ഷനില്‍ 4.36 കോടിരൂപയാണ് ഗ്രേറ്റ് ഫാദര്‍ നേടിയിരുന്നത്. എന്നാല്‍ ഇതിനെ പിന്നിലാക്കി മാസ്റ്റര്‍പീസാണ് 5.11 കോടിരൂപയോടെ റെക്കോഡിട്ടിരിക്കുന്നത്. ഒരു മലയാള സിനിമ ആദ്യദിനം ഇത്രയും റെക്കോഡ് തുക ഇതിനു മുന്‍പ് കളക്ട് ചെയ്തിട്ടില്ലെന്നും മാസ്റ്റര്‍പീസിന്റെ നിര്‍മ്മാതാക്കള്‍ അവകാശപ്പെട്ടു.
പുലിമുരുകനുശേഷം ഉദയ്കൃഷ്ണയുടെ തിരക്കഥയില്‍ അജയ് വാസുദേവ് സംവിധാനം ചെയ്ത മാസ്റ്റര്‍പീസാണ് ക്രിസ്മസ് ബോക്‌സ് ഓഫീസില്‍ ഏറ്റവും കുടുതല്‍ പണം വാരിയ സിനിമ. മമ്മൂട്ടിയുടെ സൂപ്പര്‍ ആക്ഷന്‍ രംഗങ്ങളാണ് സിനിമയുടെ ഹൈലൈറ്റ്്. ചിത്രത്തില്‍ മമ്മൂട്ടി ഇംഗ്ലീഷ് പ്രഫസറായ എഡ്വേര്‍ഡ് ലിവിംഗ്സ്റ്റണ്‍ എന്ന കഥാപാത്രമായാണ് എത്തുന്നത്.സി.എച്ച് മുഹമ്മദ് വടകരയാണ് ചിത്രത്തിന്റെ നിര്‍മ്മാതാവ്. പതിനഞ്ച് കോടിയുടെ മുതല്‍ മുടക്കിലാണ് ചിത്രം ഒരുക്കിയത്.
സുരേഷ് ഗോപിയുടെ മകന്‍ ഗോകുല്‍ സുരേഷ് ഈ ചിത്രത്തില്‍ മമ്മൂട്ടിക്കൊപ്പം പ്രധാന വേഷത്തിലെത്തുന്നുണ്ട്. ഉണ്ണി മുകുന്ദനും ശ്രദ്ധേയമായ വേഷത്തിലുണ്ട്. വരലക്ഷ്മി ശരത്കുമാറും, പൂനം ബജ്വയുമാണ് നായികനിരയില്‍.
