മലയാള ചിത്രത്തിലൂടെ തമിഴിലെത്തി അവിടെ സൂപ്പര്‍ താരമായി മാറിയ നടനാണ് ചിയാന്‍ വിക്രം. താരത്തിന്റെ പുതിയ ചിത്രം കദരം കൊണ്ടേന്‍ കഴിഞ്ഞ ചിത്രം റിലീസ് ചെയ്തിരുന്നു. ചിത്രത്തിന്റെ പ്രൊമോഷനായി ചിയാന്‍ വിക്രം കഴിഞ്ഞ ദിവസം കേരളത്തിലുണ്ടായിരുന്നു. ആ അവസരത്തില്‍ വിക്രത്തെ നേരിട്ടുകണ്ട സന്തോഷത്തിലാണ് നടി മാളവിക വെയില്‍സ്. ഇന്‍സ്റ്റഗ്രാമിലൂടെയാണ് വിക്രത്തെ നേരില്‍ക്കണ്ട സന്തോഷത്തിനൊപ്പം മാളവിക ചിത്രവും പങ്കുവെച്ചത്.
“സ്വപ്നങ്ങളെ ഒരിക്കലും വഴിയില്‍ ഉപേക്ഷിക്കരുതെന്ന് പറയുകയും ജീവിതം കൊണ്ട് കാണിച്ചു തരികയും ചെയ്തയാള്‍ക്കൊപ്പമാണ് ഞാന്‍ നില്‍ക്കുന്നത്. പ്രിയപ്പെട്ട നടന്‍മാരില്‍ ഒരാളും അങ്ങേയറ്റം വിനയമുള്ളയാളുമായ അദ്ദേഹത്തിനൊപ്പം നില്‍ക്കുമ്പോള്‍ നാണിക്കാതിരിക്കാന്‍ കഴിഞ്ഞില്ല.” മാളവിക ഫോട്ടോ പങ്കുവെച്ച് കുറിച്ചു.
https://www.instagram.com/p/B0Nqm1ogR9M/?utm_source=ig_web_copy_link
വിക്രത്തിന്റെ 56ാം ചിത്രമാണ് കദരം കൊണ്ടാന്‍. സ്‌പൈ ആക്ഷന്‍ ത്രില്ലറായി ഒരുക്കിയിരിക്കുന്ന ചിത്രത്തില്‍ ഇന്റര്‍പോള്‍ ഏജന്റായാണ് വിക്രം എത്തുന്നത്. കമല്‍ഹാസനാണ് ചിത്രത്തിന്റെ നിര്‍മ്മാണം. ചിത്രത്തില്‍ കമലഹാസന്റെ മകള്‍ അക്ഷര ഹാസനും അഭിനയിക്കുന്നുണ്ട്. കമലഹാസന്‍ ചിത്രങ്ങളിലെ സ്ഥിരം സംഗീതസംവിധായകനായ ജിബ്രാനാണ് ചിത്രത്തിന് സംഗീതം ഒരുക്കിയിരിക്കുന്നത്.