ബോളിവുഡിലെ നിര്മ്മാതാവും സംവിധായകനുമായ കരണ് ജോഹറില് നിന്നും പണം തട്ടാന് ഗുണ്ടാ നേതാവ് ലോറന്സ് ബിഷ്ണോയിയും സംഘവും പദ്ധതിയിട്ടിരുന്നുവെന്ന് റിപ്പോര്ട്ട്. ഇദ്ദേഹത്തില് നിന്ന് അഞ്ച് കോടി തട്ടിയെടുക്കാന് പദ്ധതിയിട്ട കാര്യം സംഘത്തിലെ അംഗമായ മഹാകല് എന്ന സിദ്ധേഷ് കാംബ്ലെയാണ് വെളിപ്പെടുത്തിയതെന്ന് ഒരു പൊലീസ് ഉദ്യോഗസ്ഥന് അന്വേഷണ ഉദ്യോഗസ്ഥരെ അറിയിച്ചു.
സിദ്ധു മൂസെവാലയുടെ കൊലപാതകിയെന്ന് സംശയിക്കുന്ന സന്തോഷ് ജാദവിന്റെ അടുത്ത സഹായിയാണ് സിദ്ധേഷെന്നും പോലീസ് ഉദ്യോഗസ്ഥന് പറഞ്ഞു. സിദ്ധു മൂസെവാലയുടെ കൊലപാതകത്തില് സന്തോഷ് ജാദവിനും നാഗനാഥ് സൂര്യവന്ഷിക്കും പങ്കുണ്ടെന്ന് സിദ്ധേഷ് പറഞ്ഞതായി പിടിഐ റിപ്പോര്ട്ട് ചെയ്യുന്നു.
കരണ് ജോഹറിനെ ഭീഷണിപ്പെടുത്തി 5 കോടി തട്ടിയെടുക്കാന് പദ്ധതിയിട്ടുവെന്നും കാനഡ ആസ്ഥാനമായുള്ള ഗുണ്ടാസംഘവുമായി ഇന്സ്റ്റാഗ്രാമിലൂടെ പദ്ധതികള് ചര്ച്ച ചെയ്തിരുന്നുവെന്നും സിദ്ധേഷ് വെളിപ്പെടുത്തി.
മുമ്പ് ബോളിവുഡ് താരം സല്മാന് ഖാനും പിതാവ് സലിം ഖാനുമെതിരെ ബിഷ്ണോയി സംഘത്തിന്റെ വധ ഭീഷണി കത്ത് ലഭിച്ചിരുന്നു ബിഷ്ണോയിയുടെ സഹായിയായ വിക്രം ബരാദാണ് കത്ത് നടന്റെ പിതാവ് സലീം ഖാന് എത്തിച്ചിരുന്നത്. ‘മൂസെവാലയുടെ അവസ്ഥ തന്നെയാകും’ എന്നാണ് കത്തില് ഉണ്ടായിരുന്നത്.