43-ാം ജന്മദിനം ആഘോഷിക്കുകയാണ് കുഞ്ചാക്കോ ബോബന് ഇന്ന്. പിറന്നാള് ദിനത്തില് ആരാധകര്ക്കുള്ള സമ്മാനമായി “നിഴല്” ചിത്രത്തിന്റെ ഫ്സ്റ്റ് ലുക്ക് പോസ്റ്റര് പങ്കുവെച്ചിരിക്കുകയാണ് കുഞ്ചാക്കോ ബോബന്. എഡിറ്റര് അപ്പു എന്. ഭട്ടതിരി ആദ്യമായി സംവിധാനം ചെയ്യുന്ന ചിത്രമാണ് നിഴല്. ചിലപ്പോള് സ്വന്തം നിഴലിനെ വരെ നിങ്ങള് ഭയപ്പെടേണ്ടി വരും എന്നാണ് പോസ്റ്റര് പങ്കുവെച്ച് താരം കുറിച്ചത്. ജോണ് ബേബി എന്നാണ് കഥാപാത്രത്തിന്റെ പേര്.
മാസ്ക് അണിഞ്ഞാണ് പോസ്റ്ററില് കുഞ്ചാക്കോ പ്രത്യക്ഷപ്പെട്ടിരിക്കുന്നത്. കുഞ്ചാക്കോ ബോബനും നയന്താരയും ആദ്യമായി ഒന്നിക്കുന്നു എന്ന പ്രത്യേകതയോടെയാണ് നിഴല് ഒരുങ്ങുന്നത്. എറണാകുളമാണ് ചിത്രത്തിന്റെ ലൊക്കേഷന്. നയന്താരയും ഷൂട്ടിംഗിനായി ജോയിന് ചെയ്തു കഴിഞ്ഞു. 25 ദിവസമാണ് നയന്താര ഷൂട്ടിംഗിനായി കൊച്ചിയില് ഉണ്ടാവുക. ലവ് ആക്ഷന് ഡ്രാമ എന്ന സിനിമയക്ക് ശേഷം നയന്താര വീണ്ടും മലയാളത്തില് അഭിനയിക്കുന്ന ചിത്രം എന്ന പ്രത്യേകതയും നിഴലിനുണ്ട്.
ലാല്, സുധീഷ്, ഡോ. റോണി, ദിവ്യപ്രഭ എന്നിവരാണ് മറ്റ് അഭിനേതാക്കള്. ത്രില്ലര് സ്വഭാവമുള്ള ചിത്രത്തിന്റെ തിരക്കഥ ഒരുക്കുന്നത് എസ് സഞ്ജീവ് ആണ്. ദീപക് ഡി. മേനോന് ഛായാഗ്രഹണവും, സൂരജ് എസ്. കുറുപ്പ് സംഗീതസംവിധാനവും നിര്വഹിക്കുന്നു. അപ്പു ഭട്ടതിരിയും അരുണ് ലാലുമാണ് എഡിറ്റിംഗ്. അഭിഷേക് എസ് ഭട്ടതിരി-സൗണ്ട് ഡിസൈനിംഗ്, നാരായണ ഭട്ടതിരി-ടൈറ്റില് ഡിസൈന്, മേക്കപ്പ്- റോണക്സ് സേവ്യര്.
ചിത്രത്തിന്റെ പ്രൊഡക്ഷന് കണ്ട്രോളര് ഡിക്സണ് പൊഡുത്താസ് ആണ്. ആന്റോ ജോസഫ് ഫിലിം കമ്പനി, മെയ് ലോഞ്ച് ഫിലിം ഹൗസ്, ടെന്റ്പോള് മൂവീസ് എന്നിവയുടെ ബാനറുകളില് ആന്റോ ജോസഫ്, അഭിജിത്ത് എം പിള്ള, ബാദുഷ, ഫെല്ലിനി ടി പി, ജിനേഷ് ജോസ് എന്നിവര് ചേര്ന്നാണ് നിര്മ്മിക്കുന്നത്.