‘ഡോണ് ലി അണ്ണന്’ എന്ന് ഇന്ത്യന് സിനിമാ പ്രേമികള് സ്നേഹത്തോടെ വിളിക്കുന്ന കൊറിയന് താരം മാങ് ഡോങ് സിയോക് ഇന്ത്യന് സിനിമയിലേക്ക്. ഡോണ് ലി അണ്ണന് തെലുങ്ക് സിനിമയില് അഭിനയിക്കാന് സാധ്യതയുണ്ട് എന്നാണ് പുറത്തുവരുന്ന വാര്ത്തകള്.
കഴിഞ്ഞ ദിവസം അദ്ദേഹം പ്രഭാസിന്റെ ‘സാലാര് പാര്ട്ട് 2’ പോസ്റ്റര് ഇന്സ്റ്റഗ്രാമില് സ്റ്റോറിയായി പങ്കുവെച്ചിരുന്നു. ഇതാണ് പുതിയ അഭ്യൂഹങ്ങള്ക്ക് വഴി തെളിച്ചിരിക്കുന്നത്. വിവിധ ദേശീയ മാധ്യമങ്ങളും ഇക്കാര്യം റിപ്പോര്ട്ട് ചെയ്തിട്ടുണ്ട്.
ഇടക്കാലത്ത് താരത്തിന്റെ മലയാള എന്ട്രിയെച്ചൊല്ലിയുള്ള അഭ്യൂഹങ്ങള് ശക്തമായിരുന്നു. പൃഥ്വിരാജ് സംവിധാനം ചെയ്യുന്ന മോഹന് ലാല് ചിത്രം, ലൂസിഫറിന്റെ രണ്ടാം ഭാഗമായ എമ്പുരാനില് താരം എത്തുന്നുവെന്ന പ്രചാരണം സോഷ്യല് മീഡിയകളില് അടക്കം പ്രചരിച്ചിരുന്നു. ഫാന്മെയ്ഡ് പോസ്റ്ററുകളടക്കം മാങ് ഡോങ്ങിന്റേതെന്ന തരത്തില് പ്രചരിച്ചിരുന്നു.
എന്നാല് ഡോണ് ലി അണ്ണന്റെ ഇന്ത്യന് അരങ്ങേറ്റവുമായി ബന്ധപ്പെട്ട് ഇതുവരെ അണിയറപ്രവര്ത്തകരുടെ ഭാഗത്ത് നിന്ന് സ്ഥിരീകരണങ്ങളൊന്നു ഉണ്ടായിട്ടില്ല.