ഹിന്ദി ചിത്രം ‘ഹമാരേ ബാരാ’യുടെ പ്രദര്ശനാനുമതി നിഷേധിച്ച് കര്ണാടക സര്ക്കാര്. വര്ഗീയ സംഘര്ഷങ്ങള്ക്ക് കാരണമാകുമെന്ന ആശങ്ക കൊണ്ടാണ് റിലീസ് തടഞ്ഞത് എന്നാണ് വാര്ത്ത ഏജന്സിയായ എഎന്.ഐ റിപ്പോര്ട്ട് ചെയ്യുന്നത്. ഇന്ന്, ജൂണ് 7ന് ആയിരുന്നു ചിത്രത്തിന്റെ റിലീസ് തീരുമാനിച്ചിരുന്നത്.
സംസ്ഥാനത്ത് രണ്ടാഴ്ചത്തേക്കോ ഇനിയൊരു അറിയിപ്പ് ഉണ്ടാകുന്നത് വരെയോ ഈ സിനിമ പ്രദര്ശിപ്പിക്കാന് പാടില്ല എന്നാണ് സര്ക്കാര് ഉത്തരവ്.1964ലെ കര്ണാടക സിനിമ റെഗുലേഷന് ആക്ട് പ്രകാരമാണ് നടപടി. സിനിമയുടെ റിലീസ് തടയണമെന്ന് ആവശ്യപ്പെട്ട് ഏതാനും മുസ്ലീം സംഘടനകള് കര്ണാടക സര്ക്കാറിനെ സമീപിച്ചിരുന്നു.
അന്നു കപൂര്, മനോജ് ജോഷി, പരിതോഷ് ത്രിപാഠി, പാര്ഥ് സാമ്താന് എന്നിവര് പ്രധാന കഥാപാത്രങ്ങളായി എത്തുന്ന ചിത്രമാണ് ഹമാരേ ബാരാ. മതവികാരത്തെ വ്രണപ്പെടുത്തുന്നു, സാമൂഹിക ഐക്യം തകര്ക്കുന്നു എന്നീ കാരണങ്ങള് ചൂണ്ടിക്കാട്ടിയാണ് സംഘടനകള് സര്ക്കാറിനോട് സിനിമ നിരോധിക്കാന് ആവശ്യപ്പെട്ടത്.
സിനിമയുടെ വേള്ഡ് വൈഡ് റിലീസിന് ബോംബെ ഹൈകോടതി സ്റ്റേ ഏര്പ്പെടുത്തിയിരുന്നു. ജൂണ് 14 വരെയാണ് ബോംബെ കോടതി ചിത്രത്തിന് സ്റ്റേ ഏര്പ്പെടുത്തിയത്. കമല് ചന്ദ്ര സംവിധാനം ചെയ്ത ചിത്രം ബിരേന്ദര് ഭഗത്, രവി എസ് ഗുപ്ത, സഞ്ജയ് നാഗ്പാല്, ഷിയോ ബാലക് സിങ് എന്നിവര് ചേര്ന്നാണ് നിര്മ്മിക്കുന്നത്.