മലയാള സിനിമയെ ദു:ഖത്തിലാഴ്ത്തിയാണ് അപ്രതീക്ഷിതമായി കല്‍പ്പന യാത്രയായത്. പ്രേക്ഷകര്‍ക്ക് ഏറെ ഇഷ്ടപ്പെട്ട ഈ നടിയുടെ വിയോഗം സൃഷ്ടിച്ച ശൂന്യത ഇന്നും അതേ പോലെ തുടരുകയാണ്. കോമഡിയായാലും സീരിയസ് കഥാപാത്രമായലും അങ്ങേയറ്റം ഭംഗിയായി അവതരിപ്പിക്കുന്ന താരത്തിന്റെ കുറവ് പലപ്പോഴും അറിയുന്നുണ്ട്. പ്രേക്ഷക മനസ്സില്‍ ഇന്നും ദു:ഖപുത്രിയായി കല്‍പ്പന ജീവിക്കുന്നുണ്ട്. കല്‍പ്പനയുടെ മകള്‍ ശ്രീമയിയ്ക്കും അഭിനയത്തോട് ഏറെ ഇഷ്ടമാണെന്ന് മുന്‍പ് അഭിമുഖങ്ങളില്‍ വ്യക്തമാക്കിയിരുന്നു. കലാരഞ്ജിനിയുടെ പിന്നാലെ സിനിമയിലേക്കെത്തിയതാണ് കല്‍പ്പനയും ഉര്‍വശിയും. എന്നാല്‍ ഈ കുടുംബത്തില്‍ നിന്നും ഒരാള്‍ കൂടി സിനിമയില്‍ എത്തുകയാണ്. കല്‍പ്പനയുടെ മകള്‍ ശ്രീമയി
സംവിധായകന്‍ കമലിന്റെ അസോസിയേറ്റായി പ്രവര്‍ത്തിച്ചിരുന്ന സുമേഷ് ആദ്യമായി ഒരുക്കുന്ന ചിത്രത്തിലൂടെയാണ് ശ്രീമയിയുടെ സിനിമാ പ്രവേശം. “കുഞ്ചിയമ്മയും അഞ്ച് മക്കളും” എന്ന് പേരിട്ടിരിക്കുന്ന ചിത്രം പുതുമുഖങ്ങള്‍ക്ക് പ്രാധാന്യം നല്‍കുന്നു. പല വേദികളിലും തന്റെ അഭിനയമോഹത്തെക്കുറിച്ച് ശ്രീമയി തുറന്നു പറഞ്ഞിരുന്നു.
കല്‍പ്പനയുടെ കുടുംബത്തിലുള്ള മുഴുവന്‍ പേരും ശ്രീമയിയുടെ തീരുമാനത്തിന് പിന്തുണ അറിയിച്ചിട്ടുണ്ട്. പ്രേക്ഷകര്‍ ഏറെ പ്രതീക്ഷയോടെയാണ് ശ്രീമയിയുടെ സിനിമാപ്രവേശത്തിനായി കാത്തിരിക്കുന്നത്.