ജോജു ജോര്‍ജിനെയും മഞ്ജു വാര്യരെയും കേന്ദ്ര കഥാപാത്രങ്ങളാക്കി റോഷന്‍ ആന്‍ഡ്രൂസ് ഒരുക്കുന്ന ചിത്രമാണ് “പൂവന്‍കോഴി”. എന്നാല്‍ ജോജു ചിത്രത്തില്‍ നിന്നും പിന്‍മാറിയതായുള്ള റിപ്പോര്‍ട്ടുകളാണ് ഇപ്പോള്‍ പുറത്ത് വരുന്നത്. ജോജുവിന് പകരം സംവിധായകന്‍ റോഷന്‍ ആന്‍ഡ്രൂസ് തന്നെ നായകനായെത്തുമെന്നാണ് ഡെക്കാന്‍ ക്രോണിക്കിള്‍ റിപ്പോര്‍ട്ട് ചെയ്യുന്നത്.
ഉണ്ണി ആറിന്റെ നോവല്‍ “പ്രതി പൂവന്‍കോഴി”യാണ് സിനിമയാകുന്നത്. ഉണ്ണി തന്നെയാണ് ചിത്രത്തിന് തിരക്കഥയും ഒരുക്കുന്നത്. ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലനാണ് നിര്‍മ്മാണം. ജി ബാലമുരുകന്‍ ഛായാഗ്രഹണം നിര്‍വ്വഹിക്കുന്ന ചിത്രത്തിന് ഗോപി സുന്ദറാണ് സംഗീതമൊരുക്കുന്നത്.
ജോഷി ഒരുക്കിയ “പൊറിഞ്ചു മറിയം ജോസ്” ആണ് ജോജുവിന്റെ റിലീസായ ഏറ്റവും പുതിയ ചിത്രം. ജോജുവിന്റെ “ചോല” വെനീസ് ചലചിത്രമേളയില്‍ പ്രദര്‍ശിപ്പിച്ചു. സനല്‍ കുമാര്‍ ശശിധരന്‍ ഒരുക്കുന്ന “കയറ്റ”ത്തിന്റെ തിരക്കിലാണ് മഞ്ജു ഇപ്പോള്‍.