ജയസൂര്യ നായകനായെത്തുന്ന ചിത്രം “അന്വേഷണ”ത്തിന്റെ ഫസ്റ്റ് ലുക്ക് പോസ്റ്റര് അണിയറപ്രവര്ത്തകര് റിലീസ് ചെയ്തിരുന്നു. ലില്ലിക്ക് ശേഷം പ്രശോഭ് വിജയന് സംവിധാനം ചെയ്യുന്ന ചിത്രത്തിന്റെ കഥ നവാഗതനായ ഫ്രാന്സിസ് തോമസ് ആണ്. സത്യം എല്ലായ്പ്പോഴും വിചിത്രമാണ് എന്നാണ് ചിത്രത്തിന്റെ ടാഗ് ലൈന്. കൊച്ചിയിലെ ചാനല് മേധാവിയായ അരവിന്ദിന്റെ വേഷത്തിലാണ് ജയസൂര്യ എത്തുന്നത്. അവിടത്തെ തന്നെ സൂപ്പര് സ്പെഷ്യാലിറ്റി ആശുപത്രിയിലെ ഡോക്ടറായ ഗൗതം അരവിന്ദിന്റെ ആത്മസുഹൃത്താണ്. ഒരു പ്രത്യേക സാഹചര്യത്തില് ഇരുവരും കണ്ടുമുട്ടുന്നതും തുടര്ന്ന് ഉണ്ടാവുന്ന സംഭവവികാസങ്ങളുമാണ് പ്രമേയമെന്ന് അണിയറ പ്രവര്ത്തകര് പറഞ്ഞു.
സുജിത് വാസുദേവാണ് ഛായാഗ്രഹണം. ഇ4 എന്റര്ടൈന്മെന്റ്സിന്റെ ബാനറില് മുകേഷ്.ആര്.മെഹ്ത, എ.വി അനൂപ്, സി.വി സാരഥി എന്നിവരാണ് ചിത്രം നിര്മ്മിക്കുന്നത്. ഒരു ഫാമിലി ത്രില്ലര് ആയി അണിയിച്ചൊരുക്കുന്ന ചിത്രം ഒക്ടോബറില് പുറത്തിറങ്ങും.
നിരവധി ചിത്രങ്ങളാണ് ജയസൂര്യയുടേതായി അണിയറയില് ഒരുങ്ങുന്നത്. മിഥുന് മാനുവല് തോമസ് ഒരുക്കുന്ന ആട് സീരിസിന്റെ 3ഡി വേര്ഷന്, രാജേഷ് മോഹനന് തൃശ്ശൂര് പൂരം, പ്രജേഷ് സെന് ഒരുക്കുന്ന വെള്ളം, നടന് സത്യന്റെ ജീവിതം പറയുന്ന ബയോപിക്, വിനയന്റെ സംവിധാനത്തില് ഒരുങ്ങുന്ന പേരിടാത്ത ചിത്രം, വി.കെ പ്രകാശ് ഒരുക്കുന്ന ഇ. ശ്രീധരന്റെ ജീവിതകഥ എന്നിവയാണ് താരത്തിന്റേതായി അണിയറയില് ഒരുങ്ങുന്ന ചിത്രങ്ങള്.