ഷെയ്ന്‍ നിഗം നായകനായ “ഇഷ്‌ക്” സിനിമയുടെ തെലുങ്ക് റീമേക്കിന്റെ ട്രെയ്‌ലര്‍ പുറത്ത്. ഇഷ്‌ക് എന്ന് തന്നെ പേരിട്ടിരിക്കുന്ന ചിത്രത്തില്‍ തേജ സജ്ജ ആണ് ഷെയ്ന്‍ അവതരിപ്പിച്ച നായക കഥാപാത്രമായി വേഷമിടുന്നത്. പ്രിയ വാര്യര്‍ ആണ് ആന്‍ ശീതള്‍ എന്ന കഥാപാത്രമായി എത്തുന്നത്.
എസ്.എസ് രാജു സംവിധാനം ചെയ്യുന്ന ചിത്രം ഏപ്രില്‍ 23ന് ആണ് റിലീസ് ചെയ്യുന്നത്. ഛായാഗ്രഹണം സാം കെ. നായിഡു. എഡിറ്റിംഗ് വാര പ്രസാദ്. സംഗീതം മഹതി സ്വര സാഗര്‍. അതേസമയം, ട്രെയ്‌ലറിന് നേരെ നെഗറ്റീവ് കമന്റുകളും ഉയരുന്നുണ്ട്.
തെലുങ്ക് കണ്ട് നിരാശ തോന്നണ്ടെങ്കില്‍ മലയാളം ഇഷ്‌ക് കാണുക, 23 വരെ കാത്തിരിക്കണ്ട, റീമേക്ക് ചെയ്ത് ഈ നല്ല മലയാള ചിത്രം നശിപ്പിക്കരുത് എന്നിങ്ങനെയുള്ള കമന്റുകളാണ് ട്രെയ്‌ലറിന് ലഭിക്കുന്നത്. എന്നാല്‍ നായകനായ തേജ സജ്ജയെ അഭിനന്ദിച്ചും പ്രിയ വാര്യരെ പ്രശംസിച്ചുള്ള കമന്റുകളും ട്രെയ്‌ലറിന് ലഭിക്കുന്നുണ്ട്. ത്രില്ലര്‍ ചിത്രത്തിനായി കാത്തിരിക്കുകയാണെന്നും ചിലര്‍ കുറിക്കുന്നുണ്ട്.
അനുരാജ് മനോഹര്‍ സംവിധാനം ചെയ്ത ഇഷ്‌ക് 2019ല്‍ മെയ് 17ന് ആണ് റിലീസ് ചെയ്തത്. സദാചാര പൊലിസിന് എതിരെയുള്ള മറുപടിയാണ് ഇഷ്‌ക്. കൊച്ചി ഇന്‍ഫോപാര്‍ക്കില്‍ ഐടി കമ്പനി ജീവനക്കാരനായ സച്ചിദാനന്ദ്, കാമുകി വസുധ എന്നിവര്‍ക്ക് സദാചാര പൊലീസുകാരില്‍ നിന്ന് നേരിടേണ്ടി വരുന്ന ദുരനുഭവങ്ങളാണ് സിനിമയുടെ ഇതിവൃത്തം.