കേരളത്തിലടക്കം വലിയ തോതില് ചര്ച്ച ചെയ്യപ്പെടുന്ന വിഷയമാണ് സദാചാര പൊലീസിംഗ്. ഒരു ആണോ പെണ്ണോ ഒന്നിച്ചിരുന്നു, നടന്നു എന്നൊക്കെ പറഞ്ഞ് കൈയേറ്റം ചെയ്യുന്ന ഒരുകൂട്ടര്. അവര്ക്കെല്ലാം ചുട്ട മറുപടിയുമായി എത്തിയ ചിത്രമായിരുന്നു ഇഷ്ക്. ഷെയിന് നിഗം നായകനായിട്ടെത്തിയ ചിത്രം നവാഗതനായ അനുരാജ് മനോഹര് ആയിരുന്നു സംവിധാനം ചെയ്തത്. ഇപ്പോഴിതാ ചിത്രത്തിലെ കത്രിക വെയ്ക്കാത്ത ക്ലൈമാക്സ് രംഗം പങ്കു വെച്ചിരിക്കുകയാണ് അനുരാജ് മനോഹര്.
ചിത്രത്തിന്റെ ക്ലൈമാക്സ് രംഗത്തിലായിരുന്നു സെന്സര് ബോര്ഡ് കത്രിക വെച്ചത്. അതേ രംഗത്തിന്റെ എഡിറ്റ് കോപ്പിയാണ് തന്റെ ഫെയ്സ്ബുക്ക് പേജിലൂടെ സംവിധായകന് അനുരാജ് മനോഹര് പങ്കുവെച്ചത്. “ഇഷ്കിന്റെ ,ഇടപെടലുകള് ഇല്ലാത്ത കത്രിക വെയ്ക്കാത്ത സംവിധായകന്റെ വേര്ഷന്. വസുധയുടെ നടുവിരല് വ്യക്തമാണ്.” എന്ന തലക്കെട്ടോടെയാണ് രംഗം പങ്കുവെച്ചിരിക്കുന്നത്.
ചിത്രത്തില് ആന് ശീതളാണ് ഷെയ്നിന്റെ നായികയായി എത്തിയത്. ഷൈന് ടോം ചാക്കോ, ലിയോണ ലിഷോയ് എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിച്ചത്.