ഹൃദയം സിനിമ തനിക്ക് വർക്ക് ആയില്ലെന്നും, ചിത്രത്തിലെ പല സീനുകളും ക്രിഞ്ച് ആയി തോന്നിയെന്നും ധ്യാൻ ശ്രീനിവാസൻ. തന്റെ പുതിയ ചിത്രമായ ‘നദികളിൽ സുന്ദരി യമുന’ എന്ന സിനിമയുമായി ബന്ധപ്പെട്ട് മാധ്യമങ്ങളോട് സംസാരിക്കുമ്പോഴായിരുന്നു ചേട്ടന്റെ സിനിമയെ കുറിച്ച് അനിയന്റെ പരാമര്ശം.
“പതിനെട്ടു മുതൽ ഇരുപത്തിയഞ്ച് വയസ്സുള്ളവരുടെ അടുത്ത് പോയി ഹൃദയം ക്രിഞ്ചാണെന്ന് പറഞ്ഞാൽ അവർ നമ്മളെ അടിച്ചു കൊല്ലും, അതേ സമയം മുപ്പത്തിയഞ്ചിനു മുകളിലുള്ളവർക്ക് ഹൃദയത്തിലെ പല ഇൻസിഡെന്റും ക്രിഞ്ചായി തോന്നും, ക്രിഞ്ച് ഫെസ്റ്റ് ആണെന്ന് വരെ പറയുന്ന ആൾക്കാരുണ്ട്, മോക്ക് ചെയ്യുന്ന ആൾക്കാരുമുണ്ട്. എന്റെ കാലത്ത് എനിക്ക് സെലിബ്രേറ്റ് ചെയ്യാൻ ക്ലാസ്മേറ്റ്സ് പോലുള്ള സിനിമകളുണ്ടായിരുന്നു. കൊറോണയ്ക്ക് ശേഷം അവർക്ക് സെലിബ്രേറ്റ് ചെയ്യാൻ ഹൃദയം മാത്രമല്ലേയൊളളൂ. ജെനറേഷൻ ഗ്യാപ്പ് എന്നുള്ളത് സത്യമാണ്, അത് വന്നു കഴിഞ്ഞു.
നമ്മൾക്ക് സെലിബ്രേറ്റ് ചെയ്യാൻ ഒരുപാട് സിനിമകളുള്ളത് കൊണ്ട് നമ്മൾ താരതമ്യം ചെയ്യുക ആ സിനിമയുമായിട്ടാണ്. അതിനെ വെച്ച് നോക്കുമ്പോൾ ഇതൊരു സിനിമയേ അല്ല എന്ന തോന്നലുണ്ടാവുമെന്നും ധ്യാൻ പറഞ്ഞു. പുതിയ തലമുറയിലുള്ളവർക്കും തിയേറ്റർ എക്സ്പീരിയൻസ് ആഗ്രഹിക്കുന്നവർക്കും ഹൃദയം ഭയങ്കര വർക്കാണ്. അവർക്കത് പ്രിയപ്പെട്ട സിനിമകളിലൊന്നാണ്. പ്രേമം സിനിമ ഇഷ്ടപ്പെടാത്ത മുപ്പതിന് മുകളിലുള്ള ഒരുപാട് പേരുണ്ട്. തനിക്ക് തോന്നുന്നത് കൂടുതലും മുപ്പതിന് മുകളിലുള്ളവർ ഒ. ടി. ടിയിലേക്ക് മാറിയെന്നാണെന്നും അവർ വീട്ടിലിരുന്ന് സിനിമ കാണുന്നുവെന്നും ധ്യാൻ ശ്രീനിവാസൻ പറഞ്ഞു.
ധ്യാൻ ശ്രീനിവാസനെയും അജു വർഗീസിനെയും പ്രധാന കഥാപാത്രങ്ങളാക്കി വിജേഷ് പണത്തൂരും ഉണ്ണി വെല്ലോറയും സംവിധാനം ചെയ്യുന്ന പുതിയ ചിത്രമാണ് ‘നദികളിൽ സുന്ദരി യമുന’. ചിത്രം സെപ്റ്റംബർ 15 ന് തിയേറ്ററുകളിലെത്തും.