ഒറ്റ ട്രാക്കിലൂടെ ലോകത്തെ മൊത്തം ഞെട്ടിച്ച മലപ്പുറംകാരന് ഹനുമാന് കൈന്ഡ് ഇനി ബിഗ് സ്ക്രീനിലേക്ക്. ബിഗ് ഡോഗ്സ് എന്ന ഗാനത്തിലൂടെ ഗ്ലോബല് ടോപ് ചാര്ട്ടില് ഇടം നേടിയ ഹനുമാന് കൈന്ഡ് ആഷിഖ് അബു സംവിധാനം ചെയ്യുന്ന ‘റൈഫിള് ക്ലബ്’ എന്ന ചിത്രത്തിലൂടെയാണ് അഭിനയരംഗത്തേക്ക് എത്തുന്നത്.
ഭീര എന്ന കഥാപാത്രത്തെയാണ് ഹനുമാന് കൈന്ഡ് ചിത്രത്തില് അവതരിപ്പിക്കുന്നത്. കണ്ണടയും വച്ച് കയ്യില് തോക്കുമായി നില്ക്കുന്ന ഹനുമാന് കൈന്ഡിന്റെ പോസ്റ്റര് ചിത്രത്തിന്റെ അണിയറ പ്രവര്ത്തകര് പുറത്തുവിട്ടു. വാണി വിശ്വനാഥ്, ദിലീഷ് പോത്തന്, അനുരാഗ് കശ്യപ് എന്നിവരാണ് റൈഫിള് ക്ലബ്ബിലെ പ്രധാന അഭിനേതാക്കള്.
വിന്സി അലോഷ്യസ്, വിഷ്ണു അഗസ്ത്യ, സുരഭി ലക്ഷ്മി, റംസാന്, ഉണ്ണിമായ എന്നിവരും ചിത്രത്തില് മുഖ്യ വേഷങ്ങളില് എത്തുന്നുണ്ട്. ബോളിവുഡ് താരം അനുരാഗ് കശ്യപിന്റെ ആദ്യ മലയാള ചിത്രം കൂടിയാണ് റൈഫിള് ക്ലബ്. ശ്യാം പുഷ്കരന്-ദിലീഷ് കരുണാകരന്, ഷറഫു-സുഹാസ് എന്നിവരാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
ആഷിഖ് അബുവിന്റെ ‘മായാനദി’ക്ക് ശേഷം ഈ കൂട്ടുകെട്ടില് പിറക്കുന്ന ചിത്രമാണ് ‘റൈഫിള് ക്ലബ്’. ഒപിഎം സിനിമാസിന്റെയും ട്രൂ സ്റ്റോറീസിന്റെയും ബാനറിലാണ് ചിത്രമൊരുങ്ങുന്നത്. റെക്സ് വിജയനാണ് ചിത്രത്തില് സംഗീതം ഒരുക്കുന്നത്. ആഷിഖ് അബു തന്നെയാണ് ചിത്രത്തിന്റെ ഛായാഗ്രഹണം. ഈ വര്ഷം ഓണം റിലീസ് ആയാണ് ചിത്രം തിയേറ്ററുകളില് എത്തുക.