മലയാളം ബോക്സ് ഓഫീസില് ചരിത്ര നേട്ടവുമായി ദിലീപ് ചിത്രം രാമലീല. റിലീസായി 100 ദിവസത്തോട് അടുക്കുന്ന ചിത്രം ദിലീപിന്റെ കരിയറിലെ തന്നെ ഏറ്റവും മികച്ച ഇനീഷ്യല് കളക്ഷന് നേടിയ ചിത്രമാണ്. അരുണ് ഗോപിയുടെ ആദ്യ സംവിധാന സംരംഭമായ ചിത്രം നിര്മ്മിച്ചത് ടോമിച്ചന് മുകളുപാടമാണ്.
ചിത്രത്തിന്റെ അണിയറ പ്രവര്ത്തകര് ഔദ്യോഗികമായി അറിയിച്ചത് രാമലീല ആഗോള ബോക്സ് ഓഫീസില്നിന്ന് 80 കോടി രൂപ കളക്ഷന് നേടിയെന്നാണ്. ജീത്തു ജോസഫിന്റെ മോഹന്ലാല് ചിത്രം ദൃശ്യം നേടിയ 75 കോടി രൂപ കളക്ഷന് എന്ന റെക്കോര്ഡാണ് ഇതോടെ ദിലീപ് ചിത്രം മറികടന്നിരിക്കുന്നത്.
മലയാളത്തിലെ എക്കാലത്തെയും വലിയ കളക്ഷന് റെക്കോര്ഡ് ടോമിച്ചന് മുകളുപാടം തന്നെ നിര്മ്മിച്ച മോഹന്ലാല് ചിത്രം പുലമുരുകനാണ്. ഒന്നും രണ്ടും സ്ഥാനങ്ങളില് മോഹന്ലാല് തന്നെയായിരുന്നു കുറേക്കാലങ്ങളായി നിലനിന്നിരുന്നത്. ഇതാണ് ഇപ്പോള് ദിലീപ് ചിത്രം മറികടന്നിരിക്കുന്നത്. ആഗോള ബോക്സ്ഓഫീസില്നിന്ന് 152 കോടി രൂപയാണ് പുലിമുരുകന് നേടിയത്. ഈ റെക്കോര്ഡ് ഇതുവരെ മറ്റൊരു സിനിമയും തകര്ത്തിട്ടില്ല.
ദിലീപ്, പ്രയാഗാ മാര്ട്ടിന്, രാധികാ ശരത്ത്കുമാര്, മുകേഷ്, സിദ്ധിഖ് തുടങ്ങിയവരാണ് രാമലീലയിലെ അഭിനേതാക്കള്. സച്ചിയാണ് ചിത്രത്തിന്റെ തിരക്കഥ.