23നായിരുന്നു ദുല്ഖറിന്റെ ബോളിവുഡ് ചിത്രം ഛുപിന്റെ റിലീസ്. പ്രിവ്യൂസിനു ശേഷം മികച്ച അഭിപ്രായങ്ങളാണ് ചിത്രത്തെക്കുറിച്ച് സോഷ്യല് മീഡിയയില് ഉയര്ന്നത്. ഇപ്പോഴിതാ റിലീസിനു ശേഷം ചിത്രം നേടിയ ആദ്യദിന കളക്ഷനെക്കുറിച്ചുള്ള റിപ്പോര്ട്ടുകളും പുറത്തെത്തിയിരിക്കുകയാണ്.
ആദ്യദിനം ഇന്ത്യയില് നിന്ന് ചിത്രം നേടിയത് 2.5- 3 കോടിയാണെന്ന് ട്രേഡ് സോഴ്സുകളെ ഉദ്ധരിച്ച് ഹിന്ദുസ്ഥാന് ടൈംസ് റിപ്പോര്ട്ട് ചെയ്യുന്നു. ബോക്സ് ഓഫീസ് ഇന്ത്യയെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്ട്ട് ചെയ്തിരിക്കുന്നത് ചിത്രത്തിന്റെ ഇന്ത്യന് നെറ്റ് കളക്ഷന് 2.5 കോടി ആണെന്നാണ്.
അതേസമയം ചിത്രത്തിന്റെ ഔദ്യോഗിക കളക്ഷന് ഇനിയും പുറത്തെത്തിയിട്ടില്ല. സൈക്കോളജിക്കല് ത്രില്ലര് വിഭാഗത്തില് പെടുന്ന ചിത്രത്തില് സണ്ണി ഡിയോള് ആണ് മറ്റൊരു കഥാപാത്രത്തെ അവതരിപ്പിക്കുന്നത്. ആര് ബല്കിയാണ് ചിത്രത്തിന്റെ രചനയും സംവിധാനവും. ഗൌരി ഷിന്ഡെ, ആര് ബല്കി, രാകേഷ് ജുന്ജുന്വാല എന്നിവര് ചേര്ന്നാണ് നിര്മ്മാണം.
ദുല്ഖര് സല്മാന്റെ മൂന്നാമത് ബോളിവുഡ് ചിത്രമാണിത്. ഇര്ഫാന് ഖാനൊപ്പം എത്തിയ റോഡ് കോമഡി ഡ്രാമ ചിത്രം ‘കര്വാന്’ (2018) ആയിരുന്നു ദുല്ഖറിന്റെ ബോളിവുഡ് അരങ്ങേറ്റ ചിത്രം. തൊട്ടടുത്ത വര്ഷം അഭിഷേക് ശര്മ്മയുടെ സംവിധാനത്തില് ദുല്ഖര് ഇന്ത്യന് ക്രിക്കറ്റ് ടീം ക്യാപ്റ്റന് ‘നിഖില് ഖോഡ’ എന്ന കഥാപാത്രത്തെ അവതരിപ്പിച്ച ‘ദി സോയ ഫാക്ടറും’ എത്തി.