മദ്യലഹരിയില് സുഹൃത്തുക്കള്ക്കൊപ്പം നടുറോഡില് രണ്ട് പേരെ കയ്യേറ്റം ചെയ്ത സംഭവത്തില് നടന് സുധീറിനെതിരെ കേസ്. ആലപ്പുഴ എസ്.എല് പുരത്ത് വെച്ച് ഇന്നലെ രാത്രി ഏഴരയോടെയാണ് കേസിന് ആസ്പദമായ സംഭവം. ബാറിന് മുമ്പില് നിര്ത്തിയിട്ടിരുന്ന കാറിന്റെ ഡോര് തുറന്നതുമായി ബന്ധപ്പെട്ട തര്ക്കമാണ് സംഘട്ടനത്തിലേക്ക് എത്തിച്ചത്.
സുധീറും രണ്ട് സുഹൃത്തുക്കളും എസ്.എല് പുരത്തെ ബാറിന് സമീപം ദേശീയപാതയ്ക്ക് അരികില് കാര് നിര്ത്തിയിട്ടിരിക്കുകയായിരുന്നു. കാറിന്റെ വാതില് തുറന്നപ്പോള് നടന്നു പോവുകയായിരുന്ന അനൂപിന്റെ ദേഹത്ത് തട്ടി. ഇത് ചോദ്യം ചെയ്ത അനൂപിനെ ഡോര് തുറന്ന് പുറത്തിറങ്ങിയ സുധീര് ചവിട്ടി വീഴ്ത്തി . ഇതേപ്പറ്റിയുണ്ടായ വാക്കേറ്റത്തെ തുടര്ന്ന് അനൂപിന്റെ സുഹൃത്ത് ഹരീഷിനെ സുധീറും സുഹൃത്തുക്കളും വളഞ്ഞിട്ട് മര്ദ്ദിക്കുകയായിരുന്നു. ഹരീഷിന് മൂക്കിന്റെ പാലത്തിന് ഒടിവും കണ്ണിന് പരിക്കുമേറ്റു. ഇതുകണ്ട നാട്ടുകാര് വിഷയത്തില് ഇടപെട്ടു. ഇതോടെ നടനും സുഹൃത്തുക്കളും നാട്ടുകാരുമായി ഏറ്റുമുട്ടി. തുടര്ന്ന് മാരാരിക്കുളം പൊലീസ് സ്റ്റേഷനില് നിന്ന് പൊലീസ് എത്തിയാണ് സ്ഥിതിഗതി ശാന്തമാക്കിയത്.
പരിക്കേറ്റ ഹരീഷിനെയും അനൂപിനെയും ചേര്ത്തല താലൂക്ക് ആശുപത്രിയില് എത്തിച്ചു. പിന്നാലെ നടനും സംഘവും താലൂക്ക് ആശുപത്രിയിലെത്തി ഭീഷണി മുഴക്കി. തുടര്ന്ന് ഇരുവരെയും ആലപ്പുഴ മെഡിക്കല് കോളജ് ആശുപത്രിയിലേക്ക് മാറ്റി. നടനേയും സംഘത്തേയും പൊലീസിന് പിടിച്ച് കൊടുത്തെങ്കിലും അവരെ വിട്ടയച്ചു. ഇക്കാര്യം ചൂണ്ടിക്കാട്ടി ജില്ല പൊലീസ് ചീഫിന് പരാതി നല്കിയതോടെയാണ് നടനെതിരെ കേസെടുത്തത്. സംഭവത്തിന്റെ വീഡിയോ സോഷ്യല് മീഡിയയില് പ്രചരിക്കുന്നുണ്ട്.