ഡബിൾ റോളിൽ കന്നഡയിൽ തിളങ്ങനൊരുങ്ങി മലയാളികളുടെ പ്രിയ താരം ഭാവന. ജി എൻ രുദ്രേഷ് സംവിധാനം ചെയ്യുന്ന പിങ്ക് നോട്ട് എന്ന ചിത്രത്തിലാണ് ഭാവന ഇരട്ട വേഷത്തിലെത്തുന്നത്.
കുടുംബ ബന്ധങ്ങളുടെ കഥ പറയുന്ന ചിത്രം യാഥാർത്ഥ സംഭവങ്ങളെ ആസ്പദമാക്കി ആണ് എഴുതിയിരിക്കുന്നത്. വൈകാരികതയും ഉദ്വേഗവും ഒരു പോലെ കോർത്തിണക്കിയ രീതിയിലാണ് തിരക്കഥ അണിയിച്ചൊരുക്കുന്നത്.
മലയാളികളുടെ പ്രിയപ്പെട്ട ജാസിഗിഫ്റ്റാണ് ചിത്രത്തിലെ ഗാനങ്ങൾക്ക് ഈണം പകരുന്നത്. സിനിമയുടെ പൂജ കഴിഞ്ഞ ദിവസം ജാസി ഗിഫ്റ്റ് ചിത്രങ്ങൾ സോഷ്യൽ മീഡിയാ വഴി പങ്കുവെച്ചിരുന്നു.
നീണ്ട അഞ്ച് വർഷത്തെ ഇടവേളക്ക് ശേഷം മലയാള സിനിമയിലേക്ക് വീണ്ടുമെത്താൻ തയ്യാറെടുക്കുന്നതതിനിടെയാണ് ഭാവനയുടെ പുതിയ കന്നഡ സിനിമയ്ക്ക് തുടക്കം കുറിച്ചത്.
2017-ൽ പുറത്തിറങ്ങിയ ‘ആദം ജോൺ’ ആയിരുന്നു ഭാവന അവസാനമായി അഭിനയിച്ച മലയാള ചിത്രം. കന്നഡ സിനിമയിലെ സജീവ സാന്നിധ്യമാണ് ഭാവന. തഗരു, 99, ഇൻസ്പെക്ടർ വിക്രം, ശ്രീകൃഷ്ണ അറ്റ് ജീമെയിൽ.കോം, ബജ്റംഗി 2, ഗോവിന്ദ ഗോവിന്ദ തുടങ്ങിയ കന്നഡ സിനിമകളിൽ അടുത്തിടെ ഭാവന അഭിനയിച്ചിരുന്നു.