‘ലോക-ചാപ്റ്റർ വൺ: ചന്ദ്ര’ എന്ന ചിത്രത്തിലേക്ക് ആദ്യം തിരഞ്ഞെടുത്തത് ബേസിൽ ജോസഫിനെയായിരുന്നുവെന്ന് നടി കല്യാണി പ്രിയദർശൻ. ചിത്രത്തിൽ നസ്ലെൻ ചെയ്ത കഥാപാത്രം ഒരു ജനപ്രിയ നടനായിരുന്നു അവതരിപ്പിക്കേണ്ടിയിരുന്നതെന്ന അഭ്യൂഹങ്ങൾ ഓൺലൈനിൽ പ്രചരിക്കുന്നതിനിടയിലാണ് നടി ഈ കാര്യം വെളിപ്പെടുത്തിയത്.
സിനിമയിലെ ഒരു പ്രധാന വേഷത്തിനായി ആദ്യം പരിഗണിച്ചത് നടനും സംവിധായകനുമായ ബേസിൽ ജോസഫിനെയാണെന്നാണ് കല്യാണി പറഞ്ഞത്. ‘ഈ സിനിമ ചെയ്യണമെന്ന് എന്നോട് ആദ്യം പറഞ്ഞത് ബേസിൽ ആയിരുന്നു. തുടക്കത്തിൽ, ലോകയിൽ ബേസിൽ ഒരു വേഷം ചെയ്യേണ്ടതായിരുന്നു. പക്ഷേ അദ്ദേഹത്തിന് ഡേറ്റ് ഉണ്ടായിരുന്നില്ല’ എന്ന് കല്യാണി ദി ഹോളിവുഡ് റിപ്പോർട്ടർ ഇന്ത്യ ആക്ടേഴ്സ് റൗണ്ട് ടേബിളിൽ സംസാരിക്കവെ പറഞ്ഞു.
ബേസിലിന്റെ തിരക്കേറിയ ഷെഡ്യൂൾ കാസ്റ്റിംഗ് പ്ലാനിൽ മാറ്റങ്ങൾ വരുത്തി എന്നും കല്യാണി വിശദീകരിച്ചു. ഇതോടെ സണ്ണി എന്ന കഥാപാത്രത്തിലേക്ക് ആദ്യം ബേസിലിനെയാണ് പരിഗണിച്ചിരുന്നത് എന്നും പിന്നീട് ആ കഥാപാത്രത്തെ നസ്ലെൻ അവതരിപ്പിക്കുകയായിരുന്നു എന്നുമാണ് റിപ്പോർട്ടുകൾ.
കല്യാണിയുടെ കമന്റിന് ‘ഇനിയും നാല് ഭാഗങ്ങൾ കൂടി വരുന്നുണ്ട്, അല്ലേ? ഞാൻ തീർച്ചയായും അതിൽ ഒന്നിൽ വരും’ എന്നും ബേസിൽ ജോസഫ് മറുപടി നൽകി. നടി മമിത ബൈജുവും ‘ലോക’ യൂണിവേഴ്സിന്റെ ഭാഗമാകാൻ താൽപര്യം പ്രകടിപ്പിച്ചിരുന്നു എന്നാണ് റിപ്പോർട്ട്.